ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Բառադիի բառադի բիզնեսը

Հանրապետական պատգամավոր Համլետ Հարությունյանը, նույն ինքը` Բառադի Համոն, այն հազվագյուտներից է, որ բիզնեսներ չունի: Ստիպված խորհրդարանական յուրօրինակ եւ շատ «բառադի» բիզնես է հորինել: Նա մոտենում է օլիգարխ պատգամավորներին եւ այլ պատգամավորների ներկայությամբ ընկերաբար  հարցնում. «Որ հենց հիմա միլիոն ունենաս, կեսը կտա՞ս ինձ»:

«Անպայման»` սովորաբար պատասխանում են եւ ընկնում կրակը: Որովհետեւ Բառադի Համոն տեղնուտեղը թեւանցուկ է անում երդում կերած մարդուն եւ նրան ուղեկցում է հաշվապահություն, որտեղ պարզվում է, որ փողի կարիք առանձնապես չունեցող օլիգարխի աշխատավարձը կուտակվել, կարգին փող է դարձել: Պատգամավորը  ստանում եւ ստիպված աշխատավարձի կեսը տալիս է Համլետ Հարությունյանին:

Բառադի Համոն այս փորձը հաջողությամբ գործարկել է մի քանի անգամ, սակայն, ըստ խորհրդարանական մեր աղբյուրի, այլեւս հազիվ թե ստացվի, որովհետեւ պատգամավորները որոշել են աշխատավարձերը ժամանակին ստանալ: Այնպես որ, եթե ստիպված կիսվեն էլ, շատ չեն տուժի:

Ասում են` Բառադի Համոն կոնկրետ օլիգարխ պատգամավորից ավելի մեծ ակնկալիք է ունեցել եւ հետո բողոքել է. «Տնաշենը ոնց որ էդ փողի հույսին էր մնացել, որ բերանը չբացվեց` ասի` լրիվ քեզ ըլնի»: