Թանկացումների շքահանդեսը շարունակվում է

Ալյուրի եւ ձեթի գնաճը  ֆիքսել է նաեւ տնտեսական մրցակցության պաշտպանության պետական հանձնաժողովը: Ուրբաթ օրը` հունվարի 21-ին, գրանցել են ալյուրի 8 դրամով եւ ձեթի` 10 դրամով թանկացման մասին: Այս մասին «Երկիր»-ին ասաց Հանձնաժողովի նախագահի գլխավոր խորհրդական Արամ Սահակյանը:

Խոսքը վերաբերում է մեծածախ գներին, քանի որ Հանձնաժողովը կարող է վերահսկել շուկայում միայն գերակշիռ դեր ունեցող ընկերությունների գործունեությունը: Իսկ առանձին խանութների գնային քաղաքականությանը միջամտել չի կարող:

Թանկացման պատճառների մասին Հանձնաժողովը դեռեւս որեւէ տեղեկություն չի կարող հաղորդել, բացի այլ փորձագետների եւ մամուլում արդեն իսկ տպագրված մեկնաբանությունները, այն է, թե գնաճը կապված է միջազգային շուկայում այս ապրանքների թանկացման հետ:

Հանձնաժողովը ներկայումս ուսումնասիրում է գնային աճի եւ նվազման դինամիկան: Ա. Սահակյանն ասաց, որ եթե մոնիտորինգի արդյունքում պարզվի, որ գնի բարձրացման միտումները շարունակվում են, ապա շուկայում գերակշիռ դեր ունեցող ընկերությունը պետք է հիմնավորի, թե որն է դրա պատճառը:

Հիշեցնենք, որ թե ձեթի, թե ալյուրի շուկայում գերակշիռ դեր ունի «Ալեքս Գրիգ» ընկերությունը, որի սեփականատերն է Ազգային Ժողովի պատգամավոր Սամվել Ալեքսանյանը: