Ռուսաստանն ու հայ ժողովուրդը կապված են խոր արմատներով. Պուտին

Ռուսաստանն ու հայ ժողովուրդը կապված են պատմական խոր արմատներով, սակայն Հայաստանի համար միաժամանակ և՛ Եվրամիության, և՛ Եվրասիական տնտեսական միության կազմում լինելն անհնար է, հայտարարել է Ռուսաստանի նախագահ Վլադիմիր Պուտինը, գրում է РИА Новости-ն։

Պուտինը երկուշաբթի օրը ժամանել էր Ղրղզստան, որտեղ մասնակցել է Շանհայի համագործակցության կազմակերպության (ՇՀԿ) գագաթնաժողովին, ինչպես նաև անցկացրել մի շարք երկկողմ հանդիպումներ։

«Մեզ հայ ժողովրդի հետ կապում են պատմական բարեկամական կապեր և նույնիսկ ավելին, քան բարեկամությունը։ Մենք հայերի, ընդհանրապես հայ ժողովրդի, այդ թվում՝ աշխարհի այս տարածաշրջանում ապրող հայերի հետ հարաբերությունների շատ խոր արմատներ ունենք։ Բայց պարզապես միաժամանակ լինել մի և մյուս կազմակերպության կազմում՝ անհնար է», - ասել է Պուտինը Ղրղզստան կատարած այցի արդյունքներով լրագրողների հետ զրույցում։

Հայաստանի խորհրդարանը 2025 թվականի մարտին ընդունել է «Հայաստանի Հանրապետության՝ Եվրոպական միությանն անդամակցության գործընթացի մեկնարկի մասին» օրենքը։ Միևնույն ժամանակ Փաշինյանը նախկինում ընդունել էր, որ օրենքի ընդունումն ինքնին չի նշանակում երկրի՝ ԵՄ-ին անդամակցելու հնարավորություն։ Դրա համար անհրաժեշտ են պաշտոնական հայտի ներկայացում, թեկնածու երկրի կարգավիճակի ստացում, Եվրամիության անդամ երկրների համաձայնությունը և Հայաստանի քաղաքացիների հավանությունը։