Օրվա զավեշտը. Ժաննան ու Հրաչյան ագրարայինի վարժարանը տեղափոխում են վթարավտանգ ու ապամոնտաժվող շենք

Այսօրվա կառավարության նիստում ագրարային համալսարանին հատկացրեց Մյասնիկյան պողոտա 2 հասցեում գտնվող Գրբոյեդովի անվան նախկին դպրոցի շենքը 1587,8 քառ. մետր մակերեսով:

Yerkir.am-ն անդրադառնում է ԿԳՄՍ նախարար Ժաննա Անդրեասյանի ներկայացրած այս զավեշտալի որոշման որոշ դրվագների:

1․ Որոշման հիմնավորման մեջ նշվում  է, որ նախկինում ՀԱԱՀ  հիմնադրամից հետ է վերցվել 2-րդ ուսումնական մասնաշենքից շուրջ 40 լսարան, 7 ուսումնա-գիտական  լաբորատորիաներ և 19 աշխատասենյակներ, որը խնդիր է առաջացնելու 2025-2026 ուսումնական տարվա բնականոն գործունեությանը: Սա վերաբերում է ագրարային համալսարանի տարածքները ֆրանսիական համալսարանին տրամադրելուն:

2․ Երբ ուսումնասիրում ենք մի քանի ամիս առաջ՝ անցած տարվա հոկտեմբերի 31-ի ֆրանսիական համալսարանին տարածք հանձնելու կառավարության որոշման նախագիծը, հիմնավորման մեջ գեթ մեկ նախադասություն չենք գտնում, որը կփաստի, որ խաթարվելու է ագրարայինի բնականոն գործունեությունը: Այդ մտահոգությունը անգամ չի բարձրացրել անգամ ռեկտորի պարտականությունները կատարող Հրաչյա Զաքոյանը, որն ի դեպ օրեր առաջ պարգևատրվեց ռեկտորի պաշտոնով:

3․ Ագրարային համալսարանի տարածքներից ֆրանսիականին տրվել է շուրջ 6,000 քառ. մետր տարածք, իսկ համատեղ օգտագործման են հանձնվել կենտրոնական շքամուտքը, աստիճանավանդակը, վերելակը, մարզադահլիճը, ճաշարանը, մեծ դահլիճը, մեծ դահլիճի նախամուտքը, տանիքը և նկուղը (հազարավոր քառակուսի մետրեր): Դրա դիմաց այսօր ագրարային համալսարանին տրվում է ընդամենը 1587,8 քառ. մետր:

4․ Հիմա՝ ամենազավեշտալին: Անդրեասյան Ժաննան ու Զաքոյան Հրաչյան այս տարածք են ցանկանում տեղափոխել ագրարայինի ավագ դպրոցը: Սակայն որոշման հիմնավորումից պարզ է դառնում, որ ըստ «Քաղաքաշինական ծրագրերի փորձագիտական կենտրոն» ԲԲԸ կողմից 30․01․2024 թ․ տրամադրված շենքի տեխնիկական վիճակի և դրա վերակառուցման հնարավորության վերաբերյալ փորձագիտական եզրակացության՝ շենքի տեխնիկական վիճակը գնահատվել է խիստ անբավարար և վթարավտանգ, իսկ վնասվածության մակարդակը, ըստ համապատասխան նորմերի և չափորոշիչների, դասվում է 4-րդ աստիճան և շենքը ենթակա է ԱՊԱՄՈՆՏԱԺՄԱՆ։

Մեկնաբանությունները թողնում ենք հանրությանը:

Հ.գ. Հուսանք՝ ակադեմիական քաղաքի երախտավոր Ժաննա Շինարարը կառավարության առաջիկա նիստերում բուհերը չի տեղափոխի, օրինակ, «Նաիրիտի» կամ Չարենցավանի երբեմնի գործարանների կիսափուլ շենքեր:

Վ. Սարգսյան