«Լիզբոն 5» գործողությունը շրջադարձային եղավ հայ ժողովրդի կյանքում․ Սևակ Նազարյան

Այսօր լրանում է Լիզբոնի 5 հերոսների անձնազոհության 41-րդ տարելիցը: Արամ Մանուկյանի հուշարձանի դիմաց ՀՅԴ ՀԵՄ-ը միջոցառում է կազմակերպել, որի ժամանակ, խոսելով օրվա խորհրդի մասին, ՀՅԴ ՀԵՄ Կենտրոնական վարչության ներկայացուցիչ Սևակ Նազարյանը նշեց․ «41 տարի առաջ Լիսաբոնում գործողություն եղավ, որն իր տեսակով բացառիկ էր և կարողացավ շրջադարձային լինել հայ ժողովրդի կյանքում»,-ասաց Սևակ Նազարյանը։
 

Նշենք, որ աշխարհի ուշադրությունը Հայ Դատին սևեռելու նպատակով` 1983 թվականի հուլիսի 27-ին, Հայ հեղափոխական բանակի հինգ անդամներ` Վաչե Տաղլյանը, Սեդրակ Աճեմյանը, Սիմոն Յահնիյանը, Արա Քրջլյանը և Սարգիս Աբրահամյանը, մուտք գործեցին Պորտուգալիայի մայրաքաղաք Լիզբոնի (Լիսաբոնի) թուրքական դեսպանատուն, այդ քայլով կարողանալով միջազգային հանրության ուշադրությունը սևեռել Հայոց ցեղասպանության և Թուրքիայի կողմից այդ փաստի ժխտման վրա։

Երբ շուրջ 170 հոգուց բաղկացած ոստիկանական ուժերը շրջափակում են շենքը, Հայ վրիժառուները գերիներին բաց թողնելուց հետո անձնազոհ են լինում:

Ի դեպ, այսօր առավոտյան Սուրբ Աննա եկեղեցում կատարվել է հոգեհանգստյան կարգ՝  ի հիշատակ «Լիզբոն 5» գործողության նահատակ տղաների։