Բագրատ Սրբազանը՝ իշխանական լրատվամիջոցների թիրախում․ Civilnet.am

Մի շարք լրատվամիջոցներ ապրիլի 29-ին տարածեցին տեղեկություն, թե Տավուշի թեմի առաջնորդ Բագրատ արքեպիսկոպոս Գալստանյանը Տավուշում «բիզնեսով» է զբաղվում և «Բիչինա» անվանմամբ ավանդական մսամթերքի արտադրության սեփականատերն է։ Civilnet.am-ը, սակայն, պարզել է, որ Տավուշի թեմի առաջնորդին վերագրվող մսի արտադրությունն արդեն մոտ մեկուկես տարի է, ինչ դադարել է, իսկ Բագրատ Սրբազանը թեկուզև մասնակցել էր արտադրության հիմնադրմանը, սակայն անձնական եկամուտներ չի ստացել։

«Լուրն առաջինը հրապարակել է վարչապետի ընտանիքին պատկանող «Հայկական ժամանակը», ապա արտատպել են մերձիշխանական լրատվամիջոցներ՝ Medianews-ը, Araratnews.am-ն ու Civic.am-ը։

 
#CivilNetCheck-ը, սակայն, պարզեց, որ Տավուշի թեմի առաջնորդին վերագրվող մսի արտադրությունն արդեն մոտ մեկուկես տարի է, ինչ դադարել է, իսկ Բագրատ Սրբազանը թեկուզև մասնակցել էր արտադրության հիմնադրմանը, սակայն անձնական եկամուտներ չի ստացել։

Տավուշում Ադրբեջանի հետ հատվածային սահմանազատմանը զուգահեռ սահմանամերձ գյուղերում մեկնարկած բողոքի ցույցերին իր ակտիվ ներգրավվածությամբ աչքի է ընկնում Տավուշի թեմի առաջնորդ Բագրատ Սրբազանը։ Ի պատասխան Գալստանյանի այս գործունեությանը՝ մի շարք իշխանամերձ լրատվականներ, տելեգրամյան ու յութուբյան ալիքներ օրեցօր նոր, որևէ փաստերով չհիմնավորված թեզեր են ներկայացնում Գալստանյանի մասին։

Այդ հրապարակումներում Բագրատ Սրբազանին մեղադրում են «ԿԳԲ-ի գործակալ» լինելու, «Կրեմլից միլիոնավոր դոլարներ ստանալու» և այլ «զանցանքների» մեջ։ Սակայն տարածվող պնդումները մեծ մասամբ որևէ փաստացի հիմնավորում չունեն։

Ըստ ընկերության տնօրենի՝ Սրբազանը արտադրությունից շահույթ չի ստացել

Բագրատ Սրբազանի՝ Տավուշում բիզնեսով զբաղվելու մասին տեղեկությունը «Հայկական ժամանակի» հրապարակումից հետո սկսեց ակտիվ տարածվել իշխանամերձ բլոգերների ու լրատվամիջոցների միջոցով:

Բագրատ Սրբազանն իսկապես «Շամշադին Էկո Միթ» արտադրական կոոպերատիվի իրական շահառուների ցանկում է։ #CivilNetCheck-ը խոսեց «Շամշադին Էկո Միթ» ընկերության տնօրեն Նորայր Հարությունյանի հետ։ Վերջինս նշեց, որ Բագրատ արքեպիսկոպոսը արտադրության հիմնադրման թիկունքում էր ու օգնել էր ներդրողների հետ կապեր հաստատել։ «Շամշադին Էկո Միթը» արտադրական կոոպերատիվ է, որը, ըստ Հարությունյանի, ի սկբանե հիմնադրվել էր որպես սոցիալական ձեռնարկություն, որպեսզի Տավուշի բնակիչները կարողանան իրենց մսամթերքը վաճառքի հանել։ Ծրագիրը ֆինանսավորվել է կառավարության ու Եվրամիության տրամադրած միջոցներով։

Հարությունյանը պնդեց, որ արտադրությունը սկսելուց հետո Սրբազանը այլևս չի մասնակցել ընկերության ներքին գործընթացներին ու դրանից եկամուտ չի ստացել։

«Վաճառքի շահույթը գնում էր վերարտադրությանը, նոր մսամթերք ու տեխնիկական միջոցների ձեռք բերմանը»,- նշեց տնօրենը՝ հավելելով, որ ավելի քան մեկուկես տարի է, ինչ ընկերությունը դադարեցրել է իր գործունեությունը։

Ըստ նրա՝ դադարեցման պատճառը 2020-ին կորոնավիրուսի համաճարակն ու պատերազմն էր։

2024-ի փետրվարի դրությամբ Բագրատ Գալստանյանը (քաղաքացիական անունը՝ Վազգեն Գալստանյան) դեռևս արտադրական կոոպերատիվի 25%-ի բաժնետեր էր, իսկ Տավուշի թեմն իր հերթին երբևէ չի թաքցրել իր աջակցությունը մսամթերքի արտադրությանը։

Բագրատ Սրբազանը՝ իշխանության թիրախում

Ապրիլի 24-ին «Բաղրամյան 26» տելեգրամյան ալիքը հրապարակել է «Կործանել եկեղեցին ու դառնալ կաթողիկոս» վերնագրով նյութ, որը մի քանի րոպեների ընթացքում արտատպել են իշխող «Քաղաքացիական պայմանագիր» կուսակցությանը պատկանող Civic.am-ն-ն ու ՔՊ կուսակցության պատգամավոր Խաչատուր Սուքիասյանի հետ փոխկապակցված Araratnews.am-ը։ Նշենք, որ Ժամանակին Araratnews.am-ի գլխավոր խմբագիր է եղել Ազգային ժողովի նախագահ Ալեն Սիմոնյանը։

Հոդվածում նշվել է, թե ապրիլի 24-ին Ամենայն Հայոց Կաթողիկոս Գարեգին Բ-ն պետք է հանդիպեր Բագրատ Սրբազանին։ Մի քանի ժամ անց Civic.am-ը, սակայն, գրել է, թե Բագրատ Գալստանյանը մերժել է հանդիպումել կաթողիկոսի հետ։

Հոդվածում պնդում էր էր արվում, թե Բագրատ Սրբազանը կաթողիկոս դառնալու լուրջ հավակնություններ ունի

«Պատահական չէ, որ մամուլում գրվել է, որ Տավուշի թեմի առաջնորդն իր շրջապատում ասել է, որ եթե այս շարժումը նույնիսկ չհաջողի, ինքը «աչոկներ» է հավաքում կաթողիկոսի ապագա ընտրություններում»,- գրված էր հոդվածում։

Այս «լուրն» էլ արտատպել են Araratnews.am-ն ու Mediaroom-ը։

#CivilNetCheck-ը կապ հաստատեց Մայր Աթոռ Սուրբ Էջմիածնի տեղեկատվական համակարգի տնօրեն Տեր Եսայի քահանա Արթենյանի հետ, որը հանդիպման մասին տեղեկությունը անվանեց «հերյուրանք»։

Օրեր առաջ շրջանառվող թեզերից էր, թե Բագրատ Սրբազանը գլխավորել է 2018-ին Գարեգին Բ-ի դեմ իրականացվող «Նոր Հայաստան, նոր հայրապետ» շարժումը՝ պահանջելով նրա հեռացումը։ Մինչդեռ, Սրբազանը որևէ կերպ ներգրավված չի եղել այդ շարժման մեջ։

Բագրատ արքեպիսկոպոսի ու կաթողիկոսի միջև հակադրության բացակայությունը կարելի է հիմնավորել, օրինակ, այն փաստով, որ Գալստանյանը 2023-ին Գարեգին Բ-ի կոնդակով արքայության պատիվ է ստացել։

Ընդհանուր առմամբ, Տավուշում ցույցերի մեկնարկից ի վեր՝ ապրիլի 20-ից մինչև ապրիլի 30-ը, civic.am-ում հրապարակվել է Բագրատ Սրբազանին թիրախավորող քսանից ավելի հոդված։ Միաժամանակ, araratnews.am-ում Սրբազանի մասին տասնհինգից ավելի հոդված է առկա, որոնց զգալի մասը վերահրապարակումներ են Civic-ից ու Medianews-ից։ Իսկ առավել հետևողական տեղեկություններ մատուցողը, թերևս, medianews.site կայքն է, որտեղ հրապարակվել է առնվազն քսանութ քննադատական նյութ՝ Տավուշում բողոքի ցույցերի պոռթկումից ի վեր։

Դեռ 2021-ին Ինֆոքոմը բացահայտել էր, որ medianews.site-ը կապված է վարչապետի աշխատակազմի ղեկավարի տեղակալ Տարոն Չախոյանի հետ։

Բագրատ Գալստանյանին թիրախավորող հոդվածները վերահրապարակել եննաև freenews.am լրատվականում, որի տնօրենն ու գլխավոր խմբագիրը ԱԺ նախագահ Ալեն Սիմոնյանի կինն է՝ Մարիամ Մարգարյանը։

Ուշագրավ է, որ Չախոյանը վերրջին օրերին Բագրատ Սրբազանին անդրադարձել է ֆեյսբուքյան իր էջում գրառումներով առնվազն երեք անգամ՝ Գալստանյանին անվանելով «5-րդ շարասյան կարկառուն ներկայացուցիչ» և մեղադրելով բիզնեսով զբաղվելու մեջ։

Այսպիսով, Տավուշում բողոքի ակցիաների ակտիվ մասնակից Բագրատ Սրբազանի դեմ մերձիշխանական լրատվամիջոցներն ակտիվ քարոզչություն են իրականացնում՝ տարածելով թեզեր, որոնք որևէ կերպ հիմնավորված չեն և շատ դեպքերում կեղծ են»։