Թուրքիայում Սեւան Նշանյանի դեմ նոր դատական գործ են ուզում հարուցել

Թուրքիայի Կրոնական գործերի վարչությունը պոլսահայ լեզվաբան և գործարար Սեւան Նշանյանի դեմ դատական գործ հարուցելու համար հաղորդում է ներկայացրել Անկարայի գլխավոր հանրապետական դատախազություն։ Հաղորդման պատճառ է դարձել վերջերս Սեւան Նշանյանի հրապարակավ արտաբերած խոսքերը ազանի (մուսուլմանների աղոթքի հրավեր) և մուազենների (ազան ընթերցողները) մասին։

Այդ մասին, Akunq.net-ի փոխանցմամբ, հաղորդում է թուրքական «Անադոլու» պետական լրատվական գործակալությունը։ Աղբյուրի համաձայն՝ Սեւան Նշանյանը մասնավորապես ասել է․ «Թուրքիայում կյանքի ամենասարսափելի երևույթներից մեկն էլ անասունի պես ոռնացող մուազեններն են»։

Հաղորդման մեջ պահանջվել է դատական գործ հարուցել Սեւան Նշանյանի դեմ «քաղծառայողին ուղղված վիրավորանքի» և «ժողովրդի մեջ վրեժխնդրություն և թշնամություն հրահրելու և ժողովրդին ստորացնելու» մեղադրանքներով։

Հիշեցնենք, որ Թուրքիայում Ս․ Նշանյանը տարիներ առաջ ևս դատապարտվել էր ազատազրկման։ Նա 2014-2017 թթ․ գտնվել էր բանտում և 2017 թ․ փախել կալանտնից։ Փախուստից հետո Նշանյանն իր Twitter-յան էջում գրել էր. «Թռչնակը թռավ. նույնը մաղթում եմ մնացած 80 միլիոնին»: Այն ժամանակ նա դատապարտվել էր Իզմիրի Սիրինջե գյուղում «անօրինական» շինարարություն իրականացնելու մեղադրանքի հիմքով:

Մելինե Անումյան

Akunq.net