Ուկրաինայի գլխավոր դատախազությունը Կոմկուսի դեմ 308 քրեական գործ է հարուցել

Ուկրաինայի գլխավոր դատախազությունը  եւ անվտանգության ծառայությունը  308 քրեական գործ են հարուցել երկրի Կոմունիստական կուսակցության դեմ. տեղեկացնում է УНН-ը:

Կիեւի դատարանը սկսել է ուսումնասիրել հայցը Կոմկուսի գործունեությունն արգելելու վերաբերյալ: Ըստ մեղադրականի՝ կոմունիստները մեղադրվում են այն բանում, որ «աջակցել են Ղրիմի անեքսիային եւ Լուգանսկի ու Դոնեցկի ժողովրդական հանրապետությունների ստեղծմանը»: Երկրի արդարադատության փոխնախարար Իգոր Ալեքսեեւը հայտնել է, որ դատարանին ներկայացվել են «անհերքելի ապացույցներ»:

Այսօր՝ ավելի վաղ, Գերագույն ռադայում վերացվել է Կոմկուսի խմբակցությունը, որում եղել է 33 պատգամավոր: «Հուսով եմ՝ կոմունիստական գաղափարախոսությունը երբեք չի լինի մեր հասարակությունում»,- ասել է խորհրդարանի նախագահ Ալեքսանդր Տուրչինովը: