կարևոր
23425 դիտում, 7 ամիս առաջ - 2023-11-02 14:17
Տարածաշրջան Աշխարհ Քաղաքական

Պուտինը ստորագրել է միջուկային համապարփակ համաձայնագրի վավերացումը չեղարկող օրենքը

Պուտինը ստորագրել է միջուկային համապարփակ համաձայնագրի վավերացումը չեղարկող օրենքը

Ռուսաստանի նախագահ Վլադիմիր Պուտինը օրենք է ստորագրել, ըստ որի Ռուսաստանը հետ է կանչում Միջուկային համապարփակ համաձայնագրի (CTBT) վավերացումը։ Փաստաթուղթը հրապարակվել է իրավական տեղեկատվության պաշտոնական պորտալում։ Օրենքն ուժի մեջ է մտնում պաշտոնական հրապարակման օրվանից։ 

Պայմանագիրը Ռուսաստանի անունից ստորագրվել է Նյու Յորքում 1996 թվականի սեպտեմբերի 24-ին եւ վավերացվել 2000 թվականի մայիսի 27-ին։ Փաստաթուղթը պետք է դառնար միջուկային բոլոր տեսակի փորձարկումները դադարեցնելու հիմնական միջազգային իրավական գործիքը։ Սակայն մինչ օրս պայմանագիրն ուժի մեջ չի մտել, քանի որ այն չեն վավերացրել 44 պետություններից 8-ը, որոնք ունեն միջուկային զենք կամ դրանք ստեղծելու ներուժ։

Ինչպես նշվում է կից նյութերում, ընդունված օրենքը կոչված է վերականգնել միջուկային սպառազինությունների վերահսկման ոլորտում պարտավորությունների հավասարությունը։ Միեւնույն ժամանակ, պարզաբանվում է, որ փաստաթուղթը իրավական հիմք է ստեղծում Ռուսաստանի կողմից վավերացման փաստաթուղթը հետ կանչելու համար, սակայն չի ենթադրում երկրի դուրս գալը CTBT-ից։

Պուտինը ավելի վաղ հայտարարել էր, որ Ռուսաստանը կարող է հայելային վերաբերմունք դրսեւորել ԱՄՆ-ի հանդեպ եւ որ ՌԴ Պետդուման կարող է չեղարկել Միջուկային փորձարկումների համապարփակ արգելքի պայմանագիրը: ՌԴ նախագահի մամուլի քարտուղար Դմիտրի Պեսկովն էլ նշել էր, որ պայմանագրի վավերացումից հնարավոր հրաժարվելը դեռ չի ​​նշանակում, որ Ռուսաստանը մտադիր է միջուկային փորձարկումներ իրականացնել։