ՀՀ-ն շարունակելու է կործանարար զիջումները, քանի դեռ Փաշինյանը և ՔՊ-ական բանդան երկրի ղեկին են. պատգամավոր

44-օրյա պատերազմից անցել է երեք տարի։

2020թ. սեպտեմբերի 27-ի Ադրբեջանը սանձազերծեց արցախյան 44-օրյա պատերազմը` վարձկանների ներգրավմամբ և թուրքական զինված ուժերի անմիջական աջակցությամբ:

Պատերազմ, որը հնարավոր դարձավ իշխող ՔՊ-ական խմբակի հակաազգային և անխոհեմ քաղաքականության շնորհիվ։

Պատերազմ, որի հետևանքով մենք կորցրեցինք Շուշին, Հադրութի շրջանը, Կովսականը, Սանասարը, Մարտակերտի, Ասկերանի, Շուշիի շրջանների որոշ հատվածներ, Շահումյանի և Քաշաթաղի շրջանները (որոշ շրջաններ թշնամուն հանձնվեցին 2020-ի նոյեմբերի 9-ի եռակողմ կապիտուլացիոն հայտարարությամբ)։

Պատերազմ, որի հետևանքով ԱՀ-ում և ՀՀ-ում զոհված զինծառայողների և քաղաքացիական անձանց ընդհանուր թիվը 3822 է, իսկ 187 զինծառայողի և 21 քաղաքացիական անձի գտնվելու վայրը անհայտ է (ըստ ՀՀ քննչական կոմիտեի 21.03.2022 թ. դրությամբ):

Պատերազմ, որի հետևանքով ունեցանք շուրջ 11 հազար վիրավոր։

Պատերազմ, որի հետևանքով մեր հայրենակիցներից 885 հաշմանդամ է դարձել։

Պատերազմ, որի հետևանքով ադրբեջանական վերահսկողության տակ մնացին մի շարք հուշարձաններ և պատմամշակութային արժեք ունեցող այլ կառույցներ։

Պատերազմ, որի հետևանքով տեղահանվեցին և անօթևան դարձան հազարավոր մեր հայրենակիցներ։

Պատերազմ, որի 44-րդ օրը «հաղթելու ենք» հեշթեգով ապրող մեր քաղաքացիները տեղեկացան աննկարագրելի դավաճանության մասին:

Պատերազմ, որի ողջ ընթացքում խաբեությունը, դավադրությունը, ատելությունը դարձան փաշինյանական իշխանության պետական քաղաքականություն։

Երեկ Շիրակ մարզի ՔՊ-ական գործադիր և օրենսդիր իշխանության որոշ ներկայացուցիչներ առանց ամոթի որևէ զգացումի ծաղիկներ էին խոնարհում, «հարգանքի» տուրք մատուցում 44-օրյա պատերազմում անմահացած հերոսների հիշատակին:

Հերոսների, ովքեր իրենց կյանքը զոհաբերեցին հանուն Հայրենիքի անտեսելով սեփական եսը․ այն հերոսների ովքեր կանգնեցին մինչեւ վերջ և այդպես էլ չիմացան, որ ՀՀ-ի դավաճանական իշխանությունները թշնամուն հանձնեցին մեր հերոսների թափված արյունը, մեր պատմությունը, մեր Շուշին ու Դադիվանքը։

Եվ վերջում...

Ամեն օր լինելու է ավելի ծանր, ամեն օր նոր կորուստներ ենք ունենալու։

Հայաստանի Հանրապետությունը շարունակելու է գնալ նոր զիջումների, քանի դեռ Նիկոլ Փաշինյանը և նրա ՔՊ-ական բանդան երկրի ղեկին են։

Մհեր Մելքոնյան

ՀՅԴ Շիրակի մարզային կոմիտեության ներկայացուցիչ,

ՀՀ ԱԺ «Հայաստան» խմբակցության պատգամավոր