Թուրքիայի՝ Շվեդիայի և Ֆինլանդիայի հետ կապված հարցերը հնարավոր է լուծել. Ջեյք Սալիվան

ԱՄՆ ազգային անվտանգության հարցերով խորհրդական Ջեյք Սալիվանն ասել է, որ Թուրքիայի նախագահ Ռեջեփ Թայիփ Էրդողանի՝ ՆԱՏՕ-ին Շվեդիայի և Ֆինլանդիայի անդամակցության հետ կապված  մտահոգությունները կարող են լուծվել։

Բայդենի՝ Հարավային Կորեա և Ճապոնիա կատարած այցի ժամանակ նախագահական ինքնաթիռում Սալիվանը պատասխանել է լրագրողների հարցերին։ Նշելով, որ ԱՄՆ նախագահ Ջո Բայդենն այսօր հանդիպել է Շվեդիայի և Ֆինլանդիայի ղեկավարների հետ, նա ընդգծել է, որ Միացյալ Նահանգները լիովին աջակցում է այս երկու երկրների՝ ՆԱՏՕ-ին անդամակցելու գործընթացին։

«Մենք կարծում ենք, որ Թուրքիայի մտահոգությունները Ֆինլանդիայի և Շվեդիայի՝ ՆԱՏՕ-ին անդամակցության վերաբերյալ, որոնք արտահայտվել են նախագահ Էրդողանի և այլ պաշտոնյաների կողմից, կարող են քննարկվել և լուծվել»,- ասել է նա:

Հիշեցնելով, որ երեկ ինքը հանդիպել է իր թուրք գործընկեր Իբրահիմ Քալընի, իսկ ԱՄՆ պետքարտուղար Էնթոնի Բլինքենը՝ Թուրքիայի արտգործնախարար Մևլութ Չավուշօղլուի հետ, Սալիվանն ասել է. «Այսօր Ֆինլանդիայի նախագահը և Շվեդիայի վարչապետը հայտարարեցին, որ պատրաստ են հանդիպել և քննարկել հարցը ուղիղ նախագահ Էրդողանի հետ»:

Ըստ նրա՝ խնդիրը պետք է լուծվի Թուրքիայի, Ֆինլանդիայի և Շվեդիայի միջև։