Իրանն անընդունելի է համարում «Զանգեզուրի միջանցքը», իսկ Փաշինյանն աջակցում դրան

Հայաստանում Իրանի դեսպան Բադախշան Զոհուրին ասել է, որ Իրանի համար անընդունելի են միջանցքային տրամաբանության մեջ հնչող` հաղորդակցությունների մասին հայտարարությունները՝ նկատի ունենալով, այսպես կոչված, «Զանգեզուրի միջանցքի» մասին դեռ պատրանքներ ունեցող` Ադրբեջանի նախագահի հայտարարությունները։ Դեսպանն այս մասին ասել է ապրիլի 29-ին Սյունիքի մարզպետ Ռոբերտ Ղուկասյանի հետ հանդիպման  ժամանակ։

«Մեզ համար անընդունելի են միջանցքային տրամաբանության մեջ հնչող` հաղորդակցությունների մասին հայտարարությունները, մենք կարծում ենք, որ Հայաստանի Հանրապետությունը պետք է պահպանի իր տարածքային ամբողջականությունը»,- ասել է Իրանի դեսպանը։

Միևնույն ժամանակ, ՀՀ ներկայիս իշխանությունները ամեն բան անում են, որպեսզի իրականանա Ալիևի` «զանգեզուրյան երազանքը»:

Այսպես, ըստ քաղաքագետ Էդգար Էլբակյանի, Մեղրու հատվածում սկսվել է «թյուրքական միջանցքի» կառուցումը, որը կմիացնի թյուրքական աշխարհը ու կկտրի Հայաստանն Իրանից` դնելով թյուրքական աքցանի մեջ: