ԱՄՆ Պետդեպը հավանություն է տվել Բուլղարիային մինչեւ ութ F-16 ինքնաթիռների հնարավոր վաճառքին

ԱՄՆ Պետդեպարտամենտը հավանություն է տվել Բուլղարիային մինչեւ 8 F-16 եւ հարակից սարքավորումների հնարավոր վաճառքին՝ 1,673 մլրդ դոլար արժողությամբ գործարքի շրջանակներում, հայտնել է Պենտագոնը: Հիմնական կապալառուն կլինի Lockheed Martin-ը։

Ամերիկացի պաշտոնյաները հայտարարել են, որ վաճառքի գործարքն ուղղակիորեն կապված չէ ուկրաինական ճգնաժամի հետ, ինչը դրդել է Կիեւին դիմել այն երկրներին, ներառյալ Բուլղարիային, որոնք ունեն ռուսական արտադրության ՄիԳ ինքնաթիռներ, դրանք Ուկրաինային փոխանցելու համար:

Տեսականորեն այս ՄիԳ-երը կփոխարինվեն ամերիկյան F-16-երով։ Պենտագոնի ներկայացուցիչ Ջոն Քիրբին ասել է, որ վաճառքը չի բնութագրի որպես «փոխարինող»:

Հարցին ծանոթ աղբյուրն ասել է, որ վաճառքը «մեծ կապ չունի» ուկրաինական պատերազմի հետ, քանի որ իր օդային ուժերը արդիականացնելու ու թարմացնելու եւ ՆԱՏՕ-ի դաշնակիցների հետ համատեղելիությունը բարելավելու Բուլղարիայի երկարամյա ջանքերի մասն է կազմում:

Մեկ այլ աղբյուր նշել է, որ ինքնաթիռները նոր են, ուստի դրանք երեք-չորս տարվա ընթացքում պատրաստ կլինեն առաքման։