Թուրքիան Արևմուտքին է մեղադրում Արևելյան Միջերկրական ծովում իրավիճակի սրման մեջ

Թուրքիայի ներքին գործերի նախարար Սուլեյման Սոյլուն մի շարք կարեւոր հայտարարություններ է արել. հայտնում է Anadolu լրատվական գործակալությունը։

Նա ասել է, որ, աճող մարտահրավերների հետ կապված, Թուրքիայի առափնյա պահպանության գրասենյակի անձնակազմը հնարավոր է մի քանի անգամ ավելացվի։ Սոյլուի խոսքով՝ Թուրքիայի սահմանների մոտ լարվածության աղբյուրը Արեւմուտքի «աճող ախորժակն» է, որը ցանկանում է վերահսկողություն հաստատել Արեւելյան Միջերկրական ծովի նավթագազային հանքավայրերի վրա։

«Արևելքի երկրները հարուստ են բնական պաշարներով, բայց՝ թերզարգացած, մինչդեռ Արևմուտքում հանքավայրերի պաշարները սակավ են, իսկ պետությունները զարգացած են։ Այս անհավասարակշռությունը նպաստում է ապակայունացմանը և ձևավորում է միգրացիոն հոսքեր»,- ասել է նա:

Ըստ Սոյլուի՝ Թուրքիայի վրա ազդում են Աֆղանստանում ընթացող գործընթացները և Բալկաններում ու Սև ծովի արևմտյան հատվածում ոտք դնելու՝ ԱՄՆ-ի փորձերը։ Նա հիշեցրել է նաև Հունաստանի առափնյա պահպանության և ԱՄՆ-ի միջև վերջերս ձեռք բերված համաձայնությունը, որի կապակցությամբ ասել է. «Միանգամայն սպասելի է, որ Վաշինգտոնը կօգտվի ռեսուրսների սղությունից և Աթենքի թուրքաֆոբիայից ու երկարաժամկետ հիմքերով ոտք կդնի Հունաստան»։

«Այսօր Արևելյան միջերկրածովյան շրջանում փորձում են իրենց ազդեցությունը մեծացնել այնպիսի երկներ, ինչպիսիք են ԱՄՆ-ը, Ռուսաստանը, Մեծ Բրիտանիան, Ֆրանսիան և Իտալիան։ Այդ երկրներից ոչ մեկն ուղղակի ելք չունի Միջերկրական ծովի այս հատված»,- նշել է Սոյլուն: