Հայաստանի բուհերում հայոց լեզվի հետ կապված խնդիրներ չկան եւ չեն լինի․ նախարար

Հայաստանի բուհերում հայոց լեզվի հետ կապված խնդիրներ չկան եւ չեն լինի, թեեւ այս հարցը հաճախ է շահարկվում։ Այս մասին դեկտեմբերի 28-ին լրագրողներին ասաց Հայաստանի կրթության, գիտության, մշակույթի եւ սպորտի նախարար Վահրամ Դումանյանը։

Նա պարզաբանեց, որ ընդունելության քննությունների առարկաների ցանկը կազմում են հենց բուհերը, նախարարությունը միայն նշել է, որ չպետք է երկուսից ավելի առարկա լինի։

Նախարարը հիշեցրեց, որ դպրոցներում ավարտական քննությունների ժամանակ բոլորն արդեն հայոց լեզու են հանձնում։

«Մեր ապագան այնպիսին պետք է լինի, որ բուհ ընդունվելու համար ընդհանրապես ընդունելության քննություններ չլինեն, ինչպես դա տեղի է ունենում աշխարհի առաջատար բուհերում։ Այժմ ընդունելության քննություններն անցկացվում են այն պատճառով, որ հանրակրթության ոլորտում խնդիրներ կան՝ դասավանդման մակարդակի տարբերության առումով։ Պատկերը շատ տարբեր է ողջ երկրում»,- հավելեց նա։

Նրա խոսքով՝ այսօր որոշ կեղծ փորձագետներ մոլորեցնում են հանրությանը, նույնը նկատվում է նաեւ խորհրդարանում։

«Ես հիմա նախարարի պաշտոն եմ զբաղեցնում, բայց ինձ երբեք էքսպերտ չեմ կոչել, բայց շատ մարդիկ, ովքեր ոչնչի չեն հասել, դրամաշնորհներ են ստանում եւ որպես փորձագետ են ներկայանում»,- եզրափակեց Դումանյանը։