Ռուս խաղաղապահները երեխաների համար նախատեսված 10 տոննա հումանիտար օգնություն են հասցրել Լեռնային Ղարաբաղ. ՌԴ ՊՆ

Ռուսական խաղաղապահ զորակազմի զինծառայողներն ապահովել են 10 տոննա հումանիտար օգնության տեղափոխումը Երևանից Ստեփանակերտ՝ Լաչինի միջանցքով: Այս մասին ասվում է ՌԴ ՊՆ տեղեկագրում:  

«Այսօր Երևանից Ստեփանակերտ 10 տոննա հումանիտար բեռ է հասցվել՝ տաք ծածկոցներ, մանկական խաղալիքներ, կոնֆետների հավաքածուներ և հագուստ: Այդ ամենը նվիրվել է Լեռնային Ղարաբաղի երեխաներին ամանորյա տոներին ընդառաջ»,- ասել է խաղաղապահ զորակազմի ներկայացուցիչ Ալեքսանդր Կուդրինը:

Հումանիտար օգնությունը, որը փոխանցել են բարեգործական ընկերությունները, Մոսկվայից Երևան է հասցվել ՌԴ ՊՆ ռազմատրանսպորտային օդանավերով:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։