Իրանը նախազգուշացնում է ցանկացած սխալ հաշվարկի և իսրայելական հնարավոր արկածների մասին

ՄԱԿ-ում Իրանի մշտական ներկայացուցիչ Մաջիդ Թախտրավանչին չորեքշաբթի նամակ է գրել ՄԱԿ-ի Անվտանգության խորհրդի գործող նախագահին` ի պատասխան Իսրայելի ռեժիմի վերջին սպառնալիքների․ հայտնում է ԻՌՆԱ-ն։

Նամակում ասվում է, որ «վերջին շրջանում իսրայելական ռեժիմի արկածախնդիր և սադրիչ սպառնալիքների քանակն ավելացել է»։

Իսրայելի նոր վարչապետ Նաֆթալի Բենեթը հայտարարել էր, որ «Իրանի միջուկային ծրագրի դեմ օպերատիվ ծրագրերն ընդլայնվում են», և որ «տարբեր ոլորտներում Իրանի կարողությունների ոչնչացման գործողությունները կշարունակվեն ցանկացած ժամանակ»:

Նամակում ասվում է. «Փաստը, որ Իսրայելի ռեժիմը շարունակում է ոչնչացնել Իրանի կարողությունները, կասկածից վեր է և ապացուցում է, որ այս ռեժիմը պատասխանատու է անցյալում մեր խաղաղ միջուկային ծրագրի դեմ իրականացված ահաբեկչական հարձակումների համար»:

«Հաշվի առնելով տարածաշրջանում Իսրայելի ռեժիմի ապակայունացնող գործելաոճի չարագործ պատմությունը, ինչպես նաև Իրանի միջուկային ծրագրի դեմ քողարկված գործողությունները, այս ռեժիմի դեմ պետք է պայքարել՝ բոլոր սպառնալիքներն ու դիվերսիոն վարքագիծը դադարեցնելու համար»,- նշել է իրանցի դիվանագետը։