Foreign Policy-ն նշել է ԱՄՆ-ի համար ցանկալի՝ հիվանդ Էրդողանի իրավահաջորդին

Թուրքիայի նախագահ Թայիփ Էրդողանի հնարավոր հիվանդության մասին տեղեկատվության ֆոնին՝ Միացյալ Նահանգների համար իրադարձությունների զարգացման լավագույն տարբերակը կդառնա Ռուսաստանին թշնամի համարող ամերիկամետ ազգայնականի՝ հանրապետությունում իշխանության գալը. նշել է Կենտրոնական Ասիայի և Կովկասի ինստիտուտի համատեղ կենտրոնի ավագ գիտաշխատող Խալիլ Մագնուս Կարավելին հոկտեմբերի 5-ին Foreign Policy-ում հրապարակված հոդվածում:

Ավելի վաղ՝ հոկտեմբերի 1-ին, նույն պարբերականի էջերում սյունակագիր Սթիվեն Կուկը նշել էր, որ հանրապետության նախագահ Էրդողանը «վտանգավոր հիվանդություն ունի»: Լրագրողն իր եզրակացությունը հիմնել է տեսաձայնագրությունների վերլուծության վրա, որոնցում երևում է, որ Էրդողանի վիճակը լավ չէ․ նա առանց կնոջ օգնության չէր կարողանում աստիճաններով բարձրանալ, ոտքերը քարշ էր տալիս, հրապարակային ելույթների ժամանակ անհասկանալի արտահայտվում: Բացի դրանից՝ Կուկը ուշադրություն է դարձրել այն խոսակցություններին, թե Թուրքիայի ղեկավարը խնդիրներ ունի շնչառության, հիշողության, երբեմն նաև փսխման հետ:

Լրագրողը նշել է, որ ներկայիս պայմաններում միանգամայն հնարավոր է, որ Էրդողանի տեղը զբաղեցնի մեկ այլ «բռնակալ»: Հավանական թեկնածուների թվում նա նշել է հետախուզության ղեկավար Հաքան Ֆիդանին, ներքին գործերի նախարար Սուլեյման Սոյլուին և ազգային պաշտպանության նախարար Հուլուսի Աքարին: Ավելին՝ ավելի հավանական է, որ իշխանությունն այս երեքից վերջինի ձեռքում հայտնվի: Կուկը իրադարձությունների այս զարգացումն անցանկալի է անվանել` կապված թուրք պաշտոնյայի ազգայնական կողմնորոշման և հակաարևմտյան դիրքորոշման հետ:

Կարավելին նշում է, որ Կուկը սխալ է Աքարի հարցում, քանի որ, ի տարբերություն Թուրքիայի մնացած բարձրաստիճան պաշտոնյաների, Աքարը իսլամիստ գործիչ չէ, աշխարհիկ է և բազմիցս է հանդես եկել ԱՄՆ-ի հետ հարաբերությունների վերականգնման օգտին: