Էրդողանը ՄԱԿ-ի Գլխավոր ասամբլեայի նիստում աշխարհի առաջնորդներին կնվիրի իր նոր գիրքը

Թուրքիայի նախագահ Ռեջեփ Թայիփ Էրդողանը մտադիր է ՄԱԿ-ի Գլխավոր ասամբլեայում համաշխարհային առաջնորդներին ներկայացնել իր «Արդար աշխարհ հնարավոր է» վերնագրով գրքի օրինակները:

Երկրների ներկայացուցիչները կստանան գրքրի թարգմանված տարբերակը. հայտնում է GazeteDuvar–ը: Ինչպես նշում է կայքը, գիրքը «կենտրոնանում է այն խնդիրների վրա, որոնք գոյություն ունեն ՄԱԿ-ում, դրանք են՝ օրինականության, ներառականության, արդյունավետության, ներկայացուցչության և կառավարման առումով թերությունները»:

Հավելենք, որ Էրդողանը վաղուց ՄԱԿ-ին կոչ է արել բարեփոխել կազմակերպությունը՝ միաժամանակ առաջարկելով ՄԱԿ-ի Անվտանգության խորհրդի մշտական անդամների թիվը հասցնել 20-ի:

Գիրքը թարգմանվել է անգլերեն, ֆրանսերեն և արաբերեն:

Սեպտեմբերի 19-ին ԱՄՆ մեկնելուց առաջ Էրդողանը լրագրողներին ասել է, որ վաճառքները հասել են «լավ մակարդակի»:

Միևնույն ժամանակ, առաջին տիկին Էմինե Էրդողանը Նյու Յորքի Թուրքական մշակույթի տանը առաջին անգամ կներկայացնի Աֆրիկայում իր ճանապարհորդությունների մասին գիրքը: Նա նախատեսում է իր «Իմ ճանապարհորդությունները Աֆրիկա» գիրքը ներկայացնել այլ երկրների առաջին տիկիններին: