Թուրքիայի և ԱՄՆ պաշտպանության նախարարները քննարկել են Քաբուլի օդանավակայանի հարցը

Թուրքիայի պաշտպանության նախարար Հուլուսի Աքարը և ԱՄՆ Պենտագոնի ղեկավար Լլոյդ Ջեյմս Օսթինը հեռախոսազրույցի ընթացքում քննարկել են Քաբուլի միջազգային օդանավակայանում անվտանգության ապահովման հարցը Աֆղանստանից ՆԱՏՕ-ի զորքերի դուրս բերումից հետո: Այս մասին ասվում է Թուրքիայի ազգային պաշտպանության նախարարության՝ չորեքշաբթի տարածած հաղորդագրության մեջ:

Կողմերը մտքեր են փոխանակել օդանավակայանի անվտանգ շահագործման շուրջ երկու երկրների տեխնիկական պատվիրակությունների բանակցությունների ընթացքի վերաբերյալ:

Նշվում է, որ զրույցն անցել է դրական և կառուցողական մթնոլորտում: Նախարարները պայմանավորվել են շարունակել խորհրդակցությունները հաջորդ օրերին:

Հիշեցնենք, որ ԱՄՆ–ն առաջարկել էր Թուրքիային՝ Աֆղանստանից ԱՄՆ զորքերը դուրս բերելուց հետո տեղակայել թուրքական զորքեր Քաբուլի օդանավակայանում։