Եթե դիտարկում ենք շրջիկ մեխանիզմի և այլ խնդիրները, գործ ենք ունենում 200 հազարից ավելի քվեի հետ

«ԱԺ արտահերթ ընտրությունների քարոզարշավի ընթացքում ատելության խոսքի ահռելի ծավալ է տարածվել: Ատելության խոսքը պարզապես բառ չէ, եթե հնչում է նաև իշխանական դիրքից հանդես եկող ուժի կողմից, որը մշտապես, բոլոր հավաքների ժամանակ շրջապատված է երևի հազարավոր ոստիկաններով: Պատկերացրեք՝ խոսքեր են հնչում, որ, օրինակ, համայնքների ղեկավարների գլուխները ջարդելու են, փռելու են ասֆալտին, վենդետա են անելու»,- լրագրողների հետ ճեպազրույցում ասել է «Հայաստան» դաշինքի կենտրոնական շտաբի պաշտոնական ներկայացուցիչ Արամ Վարդևանյանը:

Արամ Վարդևանյանն անդրադարձել է նաև համակարգված խախտումներին: «Եթե դիտարկում ենք անձնագրերի, զինվորների, շրջիկ մեխանիզմի հնարավորության խնդիրները, գործ ենք ունենում 200 հազարից ավելի քվեի հետ. դա ընտրությունների ելքն ամբողջությամբ փոխող թիվ է: Այս հանգամանքներն ամբողջությամբ ներկայացվելու են ՍԴ»,- ասել է նա՝ նշելով, որ պատրաստվում են ՍԴ-ին ուղղված դիմումը ներկայացնել հնարավորինս սեղմ ժամկետներում, համաձայն օրենքի՝  արդյունքների ամփոփումից հետո 5-օրյա ժամկետում: