Էրդողանը իսլամական աշխարհին կոչ է արել քայլեր ձեռնարկել Իսրայելի դեմ

Թուրքիայի նախագահ Ռեջեփ Թայիփ Էրդողանը խոր մտահոգություն է հայտնել Արևելյան Երուսաղեմում տեղի ունեցած իրադարձությունների կապակցությամբ և սուր քննադատության ենթարկել Իսրայելի իշխանություններին: Նա Twitter-ի իր էջում գրառում է կատարել արաբերեն, եբրայերեն և թուրքերեն:

Էրդողանը իսլամական աշխարհին կոչ է արել քայլեր ձեռնարկել Իսրայելի դեմ՝ նրա գործողություններն անվանելով «դաժան հարձակումներ»: Թուրքիայի ղեկավարը հավաստիացրել է, որ Անկարան շարունակելու է աջակցել պաղեստինցիներին:

Էրդողանից բացի, Իսրայելի գործողությունները դատապարտել են նաև Թուրքիայի նախագահի մամուլի քարտուղար Իբրահիմ Քալընը, Թուրքիայի խորհրդարանի խոսնակ Մուստաֆա Շենթոփը և հասարակայնության հետ կապերի պատասխանատու Ֆահրեթին Ալթունը:

Թել Ավիվին քննադատել են նաև Թուրքիայի նախկին վարչապետ Ահմեթ Դավութօղլուն, ընդդիմադիր քեմալական Հանրապետական–ժողովրդական կուսակցության (CHP) առաջնորդ Քեմալ Քըլըչդարօղլուն և «Ազգայնական շարժում» կուսակցության (MHP) առաջնորդ Դևլեթ Բահչելին, նաև՝ «Ժողովրդավարական կուսակցություն և առաջընթաց» (DEVA) կուսակցությունը՝ Ալի Բաբաջանի գլխավորությամբ։