Էրդողանը հաստատել է, որ Թուրքիան սկզբունքորեն չի ճանաչի «Ղրիմի բռնակցումը»

Թուրքիայի նախագահ Ռեջեփ Թայիփ Էրդողանը շաբաթ օրը հայտարարել է, որ Ստամբուլում իր ուկրաինացի գործընկեր Վլադիմիր Զելենսկիի հետ բանակցություններում հաստատել է «Ղրիմի բռնակցումը» չճանաչելու՝ Անկարայի որոշումը: Այս մասին Թուրքիայի ղեկավարը հայտարարել է TRT հեռուստաալիքով հեռարձակված մամուլի ասուլիսում:

«Մենք հանդես ենք գալիս Ուկրաինայի տարածքային ամբողջականության և ինքնիշխանության օգտին: Մենք սկզբունքորեն հաստատել ենք Ղրիմի բռնակցումը չճանաչելու՝ մեր որոշումը: Մենք հայտարարել ենք, որ աջակցում ենք Ղրիմի պլատֆորմի տեսքով՝ Ուկրաինայի նախաձեռնությանը, որն ուղղված է միջազգային հանրության մերձեցմանը Ղրիմի հարցով։ Հուսով ենք, որ այս նախաձեռնությունը դրական արդյունքներ կբերի Ղրիմի բոլոր ժողովուրդներին, այդ թվում՝ Ղրիմի թաթարներին և Ուկրաինային», - ասել է Էրդողանը:

Բացի այդ՝ նա նշել է, որ Թուրքիան և Ուկրաինան «բարեկամ Ղրիմի թաթարների» համար բնակարաններ և մզկիթ կառուցելու վերաբերյալ համատեղ նախագծեր ունեն: «Բնակարանաշինության ծրագրի մասով մենք պարզապես կատարել ենք առաջին կոնկրետ քայլը: Հուսով ենք, որ առաջիկայում առաջընթաց կունենանք մզկիթների կառուցման նախագծում»,- հավելել է Էրդողանը:

Նա պնդել է, որ Թուրքիայի և Ուկրաինայի միջև համագործակցությունը պաշտպանական արդյունաբերության ոլորտումջ ուղղված չէ որևէ երրորդ կողմի դեմ: «Մենք սկսել ենք նոր խորհրդակցություններ 2 + 2 ձևաչափով (բանակցություններ երկու երկրների արտաքին գործերի և պաշտպանության նախարարների միջև), ուստի ուժեղացնում ենք համակարգումը մեր երկրների միջև: Պաշտպանական արդյունաբերության ոլորտում մեր համագործակցությունը ոչ մի ձևով ուղղված չէ երրորդ երկրների դեմ»,- ասել է Թուրքիայի նախագահը: