Թուրքիան չի ճանաչում Ղրիմի բռնակցումը և սատարում է Ուկրաինայի ամբողջականությանը. Թուրքիայի ԱԳՆ

Թուրքիան հերթական անգամ հայտարարում է Ղրիմի անօրինական բռնակցման անընդունելիության մասին, ինչը միջազգային իրավունքի կոպիտ խախտում է: Անկարան շեշտում է իր նվիրվածությունը Ուկրաինայի տարածքային ամբողջականությանը և ինքնիշխանությանը: Այս մասին, ըստ  Anadolu-ի, ասվում է Ղրիմի թերակղզու ապօրինի բռնակցման յոթերորդ տարեդարձի կապակցությամբ Թուրքիայի ԱԳՆ հայտարարության մեջ:

Հայտարարությունը հիշեցնում է, որ «2014 թվականի մարտի 16-ին Ղրիմի Ինքնավար Հանրապետության տարածքում անցկացվել է ապօրինի հանրաքվե, որի արդյունքները, որպես պատրվակ, օգտագործվել են Ղրիմի բռնակցման համար»:

«Թուրքիան հատուկ նշանակություն է տվել և շարունակում է կարևորել Ղրիմում բնիկ էթնոս համարվող Ղրիմի թաթարների անվտանգությունը, բարեկեցությունը և մշակութային ինքնության պահպանումը», - ասվում է փաստաթղթում:

Թուրքիայի արտգործնախարարությունը շեշտել է, որ Թուրքիան կշարունակի ուշադիր հետևել Ղրիմում տեղի ունեցող գործընթացներին։

Հիշեցնենք, որ Թուրքիան իրեն համարում է Ղրիմի թաթարների հովանավորը և ծավալապաշտական նկրտումներ ունի թերակղզու նկատմամբ։