Իրանը չի սատարել ղարաբաղյան հակամարտության կողմերից որևէ մեկին. իրանցի գեներալ

Իրանի ցամաքային զորքերի հրամանատար Ամիր Հեյդարին անդրադարձել է Արցախյան վերջին պատերազմի ժամանակ կողմերից որևէ մեկին աջակցելու խոսակցություններին. հատկապես ադրբեջանական կողմից հաճախ են պնդում, որ ստացել են իրանական կողմի աջակցությունը։

Գեներալը, ըատ Azariha-ի, մասնավորապես ասել է. «Մենք ԼՂ հակամարտության որևէ կողմի չենք աջակցում և նույնիսկ առաջարկում ենք նրանց այլ ուղի, բացի պատերազմից։ Այնուամենայնիվ, մեր կարմիր գիծն այն է, որ մենք թույլ չենք տա որևէ փոփոխություն տարածաշրջանի պաշտոնական և միջազգային աշխարհագրության մեջ»:

Գեներալը նշել է, որ, դիտարկելով Իրանի ընդհանուր սահմանները նշված երկու երկրների հետ, Իրանի զինված ուժերը գտնվում են նշված սահմաններում և վերահսկում զարգացումները սահմաններից դուրս:

Նա շեշտել է, որ ներկայումս Իրանի սահմաններին ոչինչ չի սպառնում, և նրանք, ովքեր գրում են Իրանի դեմ, պետք է իմանան, որ իրանական զինված ուժերը ի վիճակի են դիմակայել ցանկացած թշնամական ուժի: