Համազգայինի Լիբանանի Շրջանային վարչության ցավակցագիրը՝ Վիգեն Ստեփանյանի ընտանիքին

Համազգայինի Լիբանանի Շրջանային վարչությունը ցավակցագիր է հղել դերասան, բեմադրիչ, ՀՀ արվեստի վաստակավոր գործիչ Վիգեն Ստեփանյանի ընտանիքին, որը ներկայացնում ենք ստորև.

«Հայաստանի  Հանրապետութեան վաստակաւոր գործիչ պարոն Վիգէն Ստեփանեանի ընտանիքին.

Խոր ցաւով իմացանք պրն. Վիգէն Ստեփանեանի անակնկալ մահուան գոյժը : Այս տխուր առիթով , մեր վշտակցութիւնը կը յայտնենք ձեզի եւ անոր անմիջական բոլոր հարազատներուն:

Համոզուած ենք որ ազգի ազնիւ զաւակի, հաւատարիմ բարեկամի եւ մշակոյթի անխոնջ գործիչի անունը եւ յիշատակը միշտ վառ պիտի մնայ  բոլորիս սրտերուն մէջ:

Ան 1993-2004 տարիներուն,  Համազգային Հայ Կրթական եւ Մշակութային Միութեան պատմութեան մէջ ունեցած է նշանակալից ներդրում: Համազգայինէն ներս , անոր ունեցած գործունէութենէն մեծագոյնը հանդիսացաւ Լիբանանի մանկական թատրոնի աշխարհը , երբ իր եւ օրուան  Համազգայինի Շրջանային վարչութեան գործակցութեամբ,  յառաջացաւ մանկական "Արեգ" թատերախումբը, որ դարձաւ թատերական մարդուժի պատրաստութեան դարբնոց: "Արեգ"ը օրին, գեղարուեստի միւս դպրոցներուն հետ , Նոր Տարուան առիթով մանկական ելոյթներ տալով, մեծ խանդավառութիւն ստեղծեց լիբանանահայ մշակութային կեանքին մէջ:

Ասկէ անկախ, դարձեալ պրն. Վիգէնին եւ վարչութեան ճիգերով, իրականացաւ նաեւ «Արեգ» թատերախումբին ճամբորդութիւնը դէպի Հայաստան եւ Արցախ, ուր  մեր երեխաները ելոյթներ ունեցան ու մեծ խանդավառութիւն ստեղծեցին:

Բազմաշնորհք արուեստագէտը Համազգայինի բոլոր հանդիսութիւններուն վրայ ձգած է իր իւրայատուկ դրոշմը` կազմակերպչական բեմական յարդարումի եւ ընդհանրապէս ելոյթներու գեղարուեստական յղացքին մէջ:

19 Յունուար 2021-ին, Լիբանանահայ գաղութը կորսնցուց վաստակաշատ արուեստագէտ մը: Իր մահը սուգի կը մատնէ իր բոլոր աշակերտները, գործակիցները, ինչպէս նաեւ Համազգայինի Լիբանանի մեծ ընտանիքը: Իր աշակերտները,  ինչպէս նաեւ մենք եւ համայն հայութիւնը միշտ պիտի յիշենք պրն. Վիգէնը իր գործերուն եւ աշակերտներուն ընդմէջէն, որոնք այսօր դերասաններ եւ բեմադրիչներ են արդէն՝ «Գասպար Իփէկեան» թատերախումբէն ներս , թէ այլուր:

Պրն. Ստեփանեան Լիբանանի մշակութասէր հանրութեան ներկայացուց վաւերական աշխատանքներ եւ գործակցեցաւ հայրենի եւ լիբանանցի մեծանուն դէմքերու հետ: Յատկանշական էր , օրինակ՝ Վարուժան Խտըշեանի բեմադրութեամբ եւ Սօս Սարգսեանին հետ միասին անոր ներկայացումը:

Համազգայինի ընտանիքը առիթը ունեցաւ իր երախտագիտութիւնը յայտնելու մեծ արուեստագէտին, Հայաստանի մէջ , շուրջ երկու տարի առաջ, «Գասպար Իփէկեան» թատերախումբին ճամբով՝ զինք պարգեւատրելով ներկայացումներէն մէկուն աւարտին: Յարգանք  իր մեծ վաստակին եւ ներդրումին։

Յիշատակն Արդարոց Օրհնութեամբ Եղիցի:

Համազգայինի Լիբանանի

Շրջանային Վարչութիւն

Երեքշաբթի, 19 Յունուար 2021»: