ՀՅԴ Արեւմտեան Ամերիկայի Կեդրոնական Կոմիտէի Յայտարարութիւնը

Իրենց ձախող յուլիսեան արկածախնդրութենէն անճրկած՝ Ատրպէյճանի իշխանութիւնները անցնող ժամերուն ձեռնարկեցին նոր արկածախնդրութեան մը՝ լայնածաւալ յարձակումի դիմելով Արցախի Հանրապետութեան հետ սահմանագիծի ամբողջ երկայնքին:

Հայաստանի եւ Արցախի պաշտպանութեան նախարարութիւններու աղբիւրներէն կը տեղեկանանք, որ ծանր մարտեր տեղի կ՛ունենան բոլոր ճակատներուն վրայ, ուր Հայաստանի եւ Արցախի բանակները փայլուն կերպով կը կատարեն հայրենիքի պաշտպանութեան սուրբ գործը:

ՀՅԴ Արեւմտեան Ամերիկայի Կեդրոնական կոմիտէն խստագոյնս կը դատապարտէ մեր հայրենիքին դէմ կատարուած ատրպէյճանական նորագոյն այս յարձակումը, որ 1994ին կնքուած զինադադարէն ետք աննախդէպ է իր ծաւալով:

Այս առիթով, Կեդրոնական կոմիտէս իր ամբողջական աջակցութիւնը կը յայտնէ Հայաստանի եւ Արցախի հանրապետութիւններուն, ի մասնաւորի հայկական զոյգ բանակներուն, որոնք մեր համազգային պարծանքն են: Մեր կարգին եւ մեր կարողութիւններով պիտի ընդառաջենք Արցախի պաշտպանութեան բանակի հրամանատար զօրավար Ջալալ Յարութիւնեանի մարտակոչին՝ մեր բոլոր հնարաւորութիւնները ի սպաս դնելով մեր պետականութեան եւ հայրենի մեր ժողովուրդին: Մեր կարելի բոլոր միջոցները ի գործ պիտի դնենք, որպէսզի Միացեալ Նահանգներու պետական շրջանակները ծանրագոյն դատապարտանքի խօսքերով ուշքի բերեն խելագարութեան հասած ատրպէյճանական իշխանութիւնները: Պիտի աշխատինք օրն ի բուն, որ ամերիկեան իշխանութիւնները ամբողղջովին վերջ տան Ատրպէյճանին ռազմական օժանդակութիւն տրամադրելու քաղաքականութեան:

Դարձեալ կ՛ուզենք յիշեցնել Հայ Երիտասարդաց Դաշնակցութեան «Մեր Զինուորներուն Հետ» նախաձեռնութիւնը եւ անգամ մը եւս կը դիմենք մեր համայնքի զաւակներուն՝ զօրավիգ կանգնելու մեր սահմանները պահող հայ զինուորին:

Կասկած չունինք, որ «Յաղթելու ենք» այս անգամ եւս, եւ ամէն անգամ:

ՀՅԴ Արեւմտեան Ամերիկայի Կեդրոնական Կոմիտէ