Երկրի բնակչությունը հեռու է կորոնավիրուսի դեմ կոլեկտիվ իմունիտետի ձեւավորումից. ԱՀԿ

Երկրի բնակչությունը հեռու է կորոնավիրուսի դեմ պայքարի այն մակարդակից, որն անհրաժեշտ է կոլեկտիվ իմունիտետի ձեւավորման համար, կարծում է ԱՀԿ-ն:

Կոլեկտիվ իմունիտետը սովորաբար ձեռք է բերվում պատվաստումների միջոցով, եւ, գիտնականների մեծամասնության գնահատմամբ, բնակչության առնվազն 70%-ը պետք է ունենա հակամարմիններ` բռնկումը կանխելու համար:

ԱՀԿ-ի արտակարգ իրավիճակների ղեկավար, դոկտոր Մայքլ Ռայանն ասել է, որ մենք չպետք է ապրենք կոլեկտիվ իմունիտետ ձեռք բերելու «հույսով»։

«Որպես համաշխարհային բնակչություն, մենք չենք մոտեցել իմունիտետի այն մակարդակին, որն անհրաժեշտ է այս հիվանդության փոխանցումը դադարեցնելու համար»,- ասել է նա: «Սա լուծում չէ, որին պետք է ձգտենք»:

Մինչ օրս կատարված ուսումնասիրությունների մեծ մասը ցույց է տվել, որ մարդկանց միայն 10%-20%-ը հակամարմիններ ունի:

ԱՀԿ գլխավոր տնօրենի ավագ խորհրդական դոկտոր Բրյուս Էյլվարդը հավելել է, որ COVID-19-ի դեմ պատվաստման ցանկացած զանգվածային արշավ նպատակաուղղված կլինի աշխարհի բնակչության ավելի քան 50%-ի ընդգրկմանը։