Սերբիան 10 անգամ ավելի շատ զենք է վաճառում Ադրբեջանին, բայց ոչ-ոք չի խոսում այդ մասին. Վուչիչ

Սերբիայի նախագահ Ալեքսանդար Վուչիչը հայտարարել է, որ զենքի վաճառքը Հայաստանին ուղղված է երկրի ռազմական արդյունաբերությունը փրկելու համար։ Ասուլիսի ընթացքում Վուչիչն այսպես է պատասխանել Հայաստանի զենք վաճառելու մասին հարցին։

Վուչիչը շեշտել է, որ զենքի վաճառքը ռազմական արտադրության հաջողությունն ապահովելու միակ տարբերակն է:

«Ինչպես Ադրբեջանը, այնպես էլ Հայաստանը մեր ընկերներն են: Վերջին տարիներին մենք տասն անգամ ավելի զենք ենք վաճառել Ադրբեջանին, բայց ինչ-ինչ պատճառներով ոչ մի լրատվամիջոց չի ցանկանում հաղորդել այդ մասին: Ռազմական արդյունաբերության մեջ աշխատում է 17,000 մարդ, ովքեր պետք է պահեն իրենց աշխատանքը: Ես սկզբունքորեն հարցնում եմ ձեզ՝ ո՞ւմ ենք վաճառելու ապագայում: Ում էլ վաճառենք, ինչ-որ մեկը միշտ դժգոհ կլինի», - ասել է Վուչիչը:

Հիշեցնենք, որ ադրբեջանական haqqin.az կայքը տեղեկություն էր տարածել, որում նշվում էր, որ Սերբիան Վրաստանի տարածքով զենք է մատակարարում Հայաստանին։ Վրաստանի ԱԳՆ-ն անմիջապես հերքեց իր տարածքով զենքի փոխադրման մասին լուրերը, իսկ Սերբիան հաստատեց, նշելով, որ զենք վաճառող կազմակերպություններն ունեն ամեն տեսակի պետական աջակցություն և թույլտվություն։