Սերբիան զենք է արտահանում Հայաստան՝ երկրի իշխանությունների համաձայնությամբ. սերբ նախարար

Սերբիան զենք է արտահանել Հայաստան՝ միանգամից հինգ գերատեսչությունների հաստատմամբ՝ Արտաքին գործերի նախարարություն, ներքին գործերի նախարարություն, պաշտպանության նախարարություն, առևտրի նախարարություն և հետախուզական ծառայություն. նշել է Սերբիայի առևտրի նախարար Ռասիմ Լայլիչը:

 «2020 թվականին մասնավոր ընկերությունները զենք էին մատակարարում Հայաստան: Սերբիայում գործող զենք ունեցող պետական ընկերությունները ներգրավված չէին այդ գործարքների մեջ: Ես չեմ կարող բարձրաձայնել այդ ընկերությունների անունները, բայց, մեր տեղեկություններով, Հայաստան մատակարարվել են զենքերն ու ատրճանակները հիմնականում: Նրանց ընդհանուր արժեքը կազմել է ավելի քիչ, քան մեկ միլիոն եվրո: Մայիս-հունիսին այդ զենքերը առաքվել են երկու բեռնափոխադրմամբ », - ասաց Սերբիայի առևտրի նախարարը:

Ռասիմ Լայլիչը հիշեցրել է, որ ոչ ԵՄ-ն, ոչ ԱՄՆ-ը, ոչ Ռուսաստանը պատժամիջոցներ չեն կիրառել Հայաստանի դեմ, ուստի շատ դժվար է մերժել զենք գնելու վերաբերյալ երկրի առաջարկները:

Հիշեցնենք, որ օրեր առաջ ադրբեջանական haqqin.az կայքը հոդված էր հրապարակել, որում մեղադրում էր Սերբիային Վրաստանի տարածքով Հայաստանին զենք մատակարարելու մեջ։ Դրանից հետո Վրաստանի ԱԳՆ-ն հերքեց իր տարածքով զենքի փոխադրումը, իսկ Բաքվում Սերբիայի դեսպանը կանչվել էր ԱԳՆ։