Կարծում եմ, արտահոսք է եղել, ԲՀԿ-ում իմացել են քրգործերի մասին.Մակունց

Չկա քաղաքական պատվեր, կան իրավապահների դաշտում գտնվող որոշակի գործեր: Այս մասին այսօր, լրագրողների հետ զրույցում ասած ԱԺ «Իմ քայլը» խմբակցության ղեկավար Լիլիթ Մակունցը՝ խոսելով երեկ տեղի ունեցած դեպքերի մասին:

«Քանի որ որոշակի իրավական պրոցես է սկսվել, փորձում են այդ պրոցեսներին տալ քաղաքական երանգ: Իմ համոզմամբ որոշակի արտահոսք է տեղի ունեցել իրավապահ համակարգից, որին տեղեկացել է «Բարգավաճ Հայաստան» խմբակցության առանձին անդամներ և դրանից պաշտպանվելու առաջին քայլը եղել է քաղաքական հայտարարությամբ հանդես գալ, որը կկարողանային որակել որպես քաղաքական ճնշում»,-նշեց Մակունցը:

Yerkir.am-ի հարցին, որ իշխող ուժի ներկայացուցիչները պատգամավորների և նախարարների մակարդակով տարածում էին թղթի նկար, որը համարում էին ապացույց, արդյոք հաշվի չպիտի առնեին անմեղության կանխավարկածը, Մակունցը պատասխանեց. «Խոսեմ պատգամավորների մասին, նրանք տեղեկատվոությունը վերցրել էին և հղում էին տալիս մամուլին, ինչ վերաբերվում է անմեղության կանխավարկածին, իհարկե, որևէ մեկը չի կարող այն խախտել: Նման բան լինել չի կարող, հղում կատարելով որոշակի տեղեկատվության, դեռ չի նշանակում մեղադրանք կոնկրետ անձնանց, կոնկրետ հասցեատեր չունի, արձանագրվել է երևույթը»:

Դիտարկմանը, որ բհկ-ականները պնդում են, որ դա ֆոտոշոփ է, չկա ոչ կնիք ոչ ստորագրություն, Մակունցը պատասխանեց.

«Ազգային Անվտանգության Ծառայությունը նույնպես հրապարակել է այդ տեղեկատվությունը»:

Ինչ վերաբերվում է Ծառուկյանին անձեռնմխելիությունից զրկելու հարցին, Լիլիթ Մակունցը նշեց, որ երբ դատախազությունը միջնորդություն ներկայացնի, իրենք կքննարկեն:

Մանրամասները՝ տեսանյութում.