Չինաստանը ԱՄՆ-ին կոչ է արել ուղղել սխալները՝ չինական ԶԼՄ-ների դեմ տարվող քաղաքականության համար

ԱՄՆ-ում գործունեություն ծավալող չինական ԶԼՄ-ների վրա ԱՄՆ-ի ճնշման փորձերը ոչ միայն բարդացնում են նրանց գործունեությունը, այլև բացասական են անդրադառնում երկու երկրների միջմշակութային փոխանակության վրա. այս մասին հայտարարել է Չինաստանի ԱԳՆ պաշտոնական ներկայացուցիչ Չժաո Լիցզյանը. հայտնում է «Regnum»-ը։

Ըստ պաշտոնյայի՝ Պեկինը քննադատում է Վաշինգտոնի նման քայլերը և կոչ է անում դադարեցնել «սխալ ճանապարհով ընթանալը»։ Հակառակ դեպքում Չինաստանը համապատասխան քայլեր կձեռնարկի։

ԱԳՆ ներկայացուցիչը դարձյալ ընդգծել է, որ Հոնկոնգը Չինաստանի ներքին գործն է և ոչ մի այլ երկիր իրավունք չունի խառնվի դրան։

Մայիսի 17-ին ԱՄՆ պետքարտուղար Մայք Պոմպեոն հայտարարել էր, որ չինական իշխանությունների փորձերը՝ խառնվելու ամերիկյան ԶԼՄ-ների գործունեությանը, կարող է դիտվել որպես նրանց ինքնավարության դեմ ոտնձգություն և եթե դա շարունակվի, ԱՄՆ-ն կվերանայի Հոնկոնգի կարգավիճակի հարցը։