Չինաստանը կոչ է անում ԱՄՆ-ին՝ դադարեցնել ճնշումը չինական ընկերությունների վրա

ԱՄՆ-ը պետք է հրաժարվի առևտրատնտեսական հարաբերությունների քաղաքականացումից և դադարեցնի ճնշումը չինական ընկերությունների վրա. ըստ «ՌԻԱ Նովոստին»-ի՝ հինգշաբթի մամուլի ասուլիսում հայտնել է Չինաստանի առևտրի նախարարության խոսնակ Գաո Ֆենը։

«Ամերիկյան կողմը պետք է անհապաղ դադարեցնի չհիմնավորված ճնշումը չինական ընկերությունների վրա, անհապաղ դադարեցնի տնտեսական և առևտրային հարցերը քաղաքականացնելու սխալ գործելակերպը և ստեղծի արդար ու կայուն շուկայական միջավայր ամբողջ աշխարհի ընկերությունների, այդ թվում՝ չինական ընկերությունների համար», - ասել է նա։

Գաո Ֆենը հավելել է, որ ԱՄՆ-ը շարունակում է չարամտորեն ճնշել չինական հեռահաղորդակցության ընկերությունների գործունեությունը՝ առանց որևէ փաստական հիմքի։ Նա ընդգծել է, որ Չինաստանն անհրաժեշտ միջոցներ կձեռնարկի չինական ընկերությունների օրինական իրավունքներն ու շահերը խստորեն պաշտպանելու համար։