Երկիրը լրջագույն վիճակում թողած՝ պետք է ընկնեի նախկինների հետևի՞ց. Ռոբերտ Քոչարյան

«Իմ նախընտրական հանդիպումներին ես խոստանում էի, որ մարդկանց կյանքը պետք է բարելավեմ, ոչ թե մի քանի հոգու դատեմ։ Ճի՞շտ եմ արել, թե՞ ոչ, չգիտեմ։ Այն ժամանակ եղել է ներքին լարվածություն, դժգոհություն, բայց մենք պատերազմ չէինք պարտվել, զոհեր ու տարածքային կորուստներ չէինք ունեցել։ Անցյալը մի վտանգավոր բան էլ ունի․ կարող է գնաս ու չկարողանաս հետ գալ։ Երբ հայացքդ դեպի անցյալ է լինում, դու ապագան դժվար ես տեսնում»,- նշել է նա։

 

Ինչպե՞ս եք պատկերացնում Մեղրիի միջանցքի խնդրի լուծումը՝ հարցին ի պատասխան ՀՀ երկրորդ նախագահը հայտնել է հետևյալ դիրքորոշումը. «Միջանցք բառը հիմա ընդհանրապես չպետք է օգտագործել։ Եթե խոսքը գնում է բոլոր կոմունիկացիաների ազատ աշխատանքի մասին, այո՛, թող դրանք աշխատեն։ Ի՞նչ է նշանակում միջանցք։ Այդ հարցը քննարկելը մեզ համար ձեռնտու չէ։ Երբ որ ասում են, որ հիմա կբացվի և ամեն ինչ կսկսի աշխատել, այդպես չէ, որովհետև Թուրքիան երկաթուղի է կառուցելու Նախիջևանից դեպի Իգդիր։ Դա լինելու է մոտ 87 կմ-նոց հատված։ Նա դառնալու է միջանցք, որը կապելու է Թուրքիան Ադրբեջանի և Կենտրոնական Ասիայի երկրների հետ։ Աշխարհաքաղաքական առումով սա բավականին լուրջ հետևանքների է բերելու: Տվյալ դեպքում չափազանց մեծ սխալ կլինի քննարկել այդ միջանցքի գաղափարը, որով հետև դա լինելու է ուրիշի շահերի սպասարկման քայլ»։