Հուսով եմ՝ Վրաստանում իրադրությունը կկարգավորվի երկխոսության միջոցով. ԵԱՀԿ գլխավոր քարտուղար

ԵԱՀԿ գլխավոր քարտուղար Թոմաս Գրեմինգերը հայտարարել է, որ մտահոգված է Վրաստանում տիրող իրադրությունից ու լիահույս է, որ այն կհաջողվի կարգավորել երկխոսության միջոցով. ըստ Yerkir.am-ի՝ հայտնում է ՌԻԱ «Նովոստի»-ն:

«Անհանգստությամբ եմ հետևում Վրաստանի իրադրությանը: Հուսով եմ, որ բոլոր կողմերը կկարողանան երաշխավորել խաղաղ բողոքն ու առաջ շարժվել երկխոսության  ու օրենքի հարգման շնորհիվ»,- իր թվիթերյան էջում գրել է նա:

Yerkir.am-ն ավելի վաղ տեղեկացրել էր, որ Թբիլիսիում խորհրդարանի շենքի մոտ կիրակի տեղի է ունեցել ընդդիմադիրների, ոչ կառավարական և հասարակական կազմակերպությունների ու նրանց կողմնակիցների բազմահազարանոց հանրահավաք: Նոյեմբերի 18-ին ընդդիմադիրները պիկետ են իրականացրել խորհրդարանի շենքի առջև, իսկ ավելի ուշ հատուկ նշանակության ուժերը ցրել են հանրահավաքը:

Վրաստանի ներքին գործերի նախարարության տվյալներով՝ հանրահավաքի ցրման ընթացքում բերման է ենթարկվել ավելի քան 37 մարդ: