«Սպայկա» և «Առինջ մոլ» ընկերություններում ստուգումները շարունակվում են. ՊԵԿ նախագահ

«Սպայկա» ընկերությունում ՊԵԿ-ի ստուգումները շարունակվում են. այս մասին այսօր լրագրողների հետ զրույցում ասաց ՊԵԿ նախագահ Դավիթ Անանյանը` միաժամանակ շեշտելով, որ «Սպայկա»-ի այսօրվա գործունեությունը և իր նախկինում կատարած գործողություններին իրավական գնահատական տալը իրենք  տարանջատել են, որ ընկերության բնականոն աշխատանքին չվնասելու նպատակով:

«Այն տեղեկությունները, որոնք մենք պարբերաբար դեռևս ստանում ենք, դրանք անընդհատ մշակվում են և նոր հաշվարկներ են կատարվում»,- մանրամասնեց նա:

Ավելի վաղ տեղեկացրել էինք, որ ապրիլի 8-ին Երևան քաղաքի ընդհանուր իրավասության դատարանը բավարարել էր ՊԵԿ քննչական վարչության քննիչի միջնորդությունը և «Սպայկա» ՍՊԸ-ի հիմնադիր-տնօրեն Դավիթ Ղազարյանի նկատմամբ երկամսյա կալանքի որոշում կայացրել։

Ավելի վաղ` 2019 թ. ապրիլի 4-ին Դավիթ Ղազարյանին մեղադրանք էր առաջադրվել ՀՀ քրեական օրենսգրքի 205-րդ հոդվածի 2-րդ մասով, այն է` առանձնապես խոշոր չափերով hարկ, տուրք կամ պարտադիր այլ վճար չկատարելը:

ՊԵԿ-ի կողմից տարածված հաղորդագրության մեջ նշվում է, որ  «Սպայկա» ընկերությունը պետական բյուջե չի վճարել ընկերության ձեռնարկատիրական գործունեության արդյունքում առաջացած 7.036.666.312 ՀՀ դրամ մաքսատուրք և հարկ։

Հետագայում ընկերությունը պետբյուջե է վճարել ավելի քան 1 միլիարդ ՀՀ դրամ, իսկ  Դավիթ Ղազարյանի նկատմամբ կիրառված խափանման միջոց կայանքը փոխվել է:

Անանյանն իր խոսքում անդրադարձավ նաև ԱԺ ԲՀԿ խմբակցության առաջնորդ Գագիկ Ծառուկյանին պատկանող «Առինջ մոլ»-ում դեռևս այս տարվա ապրիլից սկսված ստուգումներին: Նա վստահեցրեց, որ առևտրի կենտրոնի տարածքում ստուգումները շարունակվում են:

«Այո, քրեական գործ կա հարուցված և այդ գործը դեռ ընթանում է: Երբ կավարտվեն ստուգումները, բնականաբար, մենք հանրությանը տեղյակ կպահենք»,- եզրափակեց նա: