Ովքեր «Հրազդան» տոնավաճառից գնացել են «Առինջ մոլ», փոշմանել են. վաճառական

Այսօր «Հրազդան» տոնավաճառի տարածքում տեղի վաճառականներից մի քանիսը կազմակերպել էին բողոքի ակցիա՝ Աբովյան քաղաքի տոնավաճառի կազմակերպիչների կողմից «Հրազդան» տոնավաճառի աշխատանքային գործունեության վերաբերյալ տարածված ապատեղեկատվության դեմ:

«Տոնավաճառներ» ՀԿ-ի նախագահ Գագիկ Դանիելյանը լրագրողների հետ զրույցում վրդովված ասաց, որ այն խոսակցությունները, թե «Հրազդան» տոնավաճառը պետք է փակվի, պարզապես ապատեղեկատվություն է: «Ես ուզում եմ մի շատ կարևոր բան ասել` անփոխարինելի մարդիկ չկան: Եթե մեզ հետ աշխատողների մի մասը գնացել է` Աբովյանում աշխատելու, նշանակում է` պետք է մեր տոնավաճառը փակվի՞: Չկա նման բան: «Հրազդան» տոնավաճառը աշխատել է, աշխատում է և շարունակելու է աշխատել: Այստեղ խնդիրն այն է, որ մենք մեր հարյուր տարվա հաճախորդներն ունենք: Մարդիկ Վարդենիսից, Ղարաբաղից ուզում են գալ ու մեզանից ապրանք առնել, բայց մեկ էլ ականջներին հասնում է, որ «Հրազդան» տոնավաճառը փակվել է: Բայց ես հրապարակային ասում եմ, որ չկա նման բան, չի կարող մեր տոնավաճառը փակվել: Ասեմ ավելին` ովքեր գնացել են նոր վաճառատեղիում աշխատելու, արդեն փոշմանել են»,- պատմեց Դանիելյանը:

Նա նշեց նաև, որ Աբովյանի տոնավաճառի համար արված 780 հազար դրամ ներդրումը կարող է բավարարել միայն երեք պատ ունենալու համար: «Այդ ներդրումը կարող է օգնել միայն երեք պատ կառուցելու համար: Մարդիկ այստեղ իրենց միջոցներն են ներդնում, որ կարողանան նորմալ տաղավար ունենալ: Բայց այնպես էլ չէ, որ կարող են թողնել ու գնալ»,- ասաց ՀԿ-ի նախագահը:

Գագիկ Դանիելյանը տեղեկացրեց նաև, որ իրենց ղեկավարներն իջեցրել են վարձավճարի չափը` նախկին 150.000-ի փոխարեն այժմ վճարում են 86.000 դրամ: