ՀՅԴ Արևմտյան Ամերիկայի երիտասարդական միության ջանքերով Շիրակի մարզում և Արցախում կկազմակերպվեն պատանեկան ճամբարներ

ՀՅԴ Հայաստանի Գերագույն մարմնում այսօր հյուրընկալվել էին ՀՅ Դաշնակցության Արևմտյան Ամերիկայի երիտասարդական միության անդամները, որոնք հայրենիքում են` կազմակերպելու համար պատանեկան ճամբարներ:

Դաշնակցության «Սիմոն Վրացյան» կենտրոնում ԳՄ ներկայացուցիչ Իշխան Սաղաթելյանը ներկայացրեց ՀՀ ներկայիս ներքաղաքական մթնոլորտը, կուսակցության քաղաքական դիրքավորումը և Դաշնակցության արժեհամակարգից բխող քաղաքական գործունեության առանձին մանրամասներ:

ՀՅԴ Արևմտյան Ամերիկայի երիտասարդական միության կողմից ճամբարներ կազմակերպվելու են ՀՀ Շիրակի մարզի Գյումրի, Արթիկ, Մեծ Մանթաշ համայնքներում, ինչպես նաև Արցախում: Նախատեսվում է, որ միայն Արևմտյան Ամերիկայից ժամանած դաշնակցական երիտասարդների կազմակերպած պատանեկան ճամբարներին կմասնակցի շուրջ 1500 պատանի:

Ամառվա ամիսների ընթացքում Դաշնակցության աշխարհասփյուռ կազմակերպության երիտասարդական միությունների կողմից Հայաստանի և Արցախի տարբեր համայնքներում կազմակերպվելու են տասնյակ պատանեկան ճամբարներ, որոնք ընդգրկելու են հազարավոր պատանիների:

Ճամբարների նպատակն է Հայաստանի պատանիների համար ընկալելի և ճանաչելի դարձնել սփյուռքահայ երիտասարդությանը, պատանիներին փոխանցել ազգային արժեհամակարգին, մշակույթին և պատմությանը վերաբերող հիմնավոր գիտելիքներ, քաղաքացիական գիտակցություն և ամրապնդել սերն ու նվիրումն առ հայրենիք: