Թուրքիան չի հեռանա ՆԱՏՕ-ից. Թուրքիայի ՊՆ ղեկավար

Թուրքիայի պաշտպանության նախարար Հուլուսի Աքարն անդրադարձել է Թուրքիա-ՆԱՏՕ հարաբերություններին` կապված ռուսական Ս-400 ՀՕՊ համակարգերի գնումից հետո առաջացած լարվածությանը:

«Թուրքիան 1990-ականների վերջից և 2000-ականների սկզբից արդեն հակաօդային պաշտպանության համակարգերի փնտրտուքների մեջ էր: Այդ թեմայով մեր դաշնակիցների, այլ երկրների հետ տարատեսակ շփումներ ունեցանք: Սակայն մեր ուզած պատասխանները չստացանք: Միակ դրական պատասխանը Ռուսաստանից եկավ, և կնքվեց Ս-400-ների համաձայնագիրը: Թուրքիան ՆԱՏՕ-ի հետ կապված ցանկացած պարտավորություն կատարել է: Չկա նման բան, երբ ասում են, թե, Ս-400-ները ձեռք բերելով, կհեռանանք ՆԱՏՕ-ից»,– Աքարի խոսքերն է մեջբերում «Անադոլու» գործակալությունը:

Նշենք, որ օրեր առաջ Էրդողանը հայտարարել էր, որ Ս-400-ների առաջին խմբաքանակը Թուրքիա կհասնի հուլիսի առաջին 15 օրերի ընթացքում, ապա`  հավելել, որ, եթե ԱՄՆ-ն Թուրքիայի նկատմամբ պատժամիջոցներ կիրառի, ապա իրենք կպատասխանեն դրան: