Անշուշտ, քաղաքական որոշում էր, չէր կարող քաղաքական չլինել. Զեյնալյանը՝ Վահե Գրիգորյանին ՍԴ անդամի թեկնածու առաջադրելու մասին

ՀՀ նախագահի կողմից ՍԴ անդամի համար Վահե Գրիգորյանի թեկնածության առաջադրումն իրավական խնդիր չի առաջացնում: Այս մասին խորհրդարանում լրագրողների հետ զրույցում ասաց ՀՀ արդարադատության նախարար Արտակ Զեյնալյանը՝ անդրադառնալով  Վահե Գրիգորյանին  երկրորդ անգամ առաջադրելու` սահմանադրական արգելքի մասին պնդումներին: 

Ինչ վերաբերում է հնչած տեսակետներին, թե Վահե Գրիգորյանին առաջադրելը խոսում է նախագահի ինստիտուտի վրա ճնշման մասին, նախարարը հակադարձեց. «Ինստիտուտները կարող են միմյանց նկատմամբ ազդեցություն ունենալ՝ տարբեր դրսևորումներով, և այն փափուկ է ու իրավաչափ, հարիր է քաղաքական մշակույթին, եթե այդպիսին գնահատվում է առաջադրված թեկնածուներին դեմ քվեարկելը կամ չքվեարկելը»:

Հարցին՝ սա քաղաքակա՞ն որոշում էր, Զեյնալյանն արձագանքեց. «Իհարկե, քաղաքական որոշում է, իրավաքաղաքական, անշուշտ, քաղաքական էր, չի կարող քաղաքական չլինել»:

Այս համատեքստում չանտեսելով Վահե Գրիգորյանի վերաբերյալ հրապարակումները, թե նա կալանավորված է եղել խարդախության մեղադրանքով, արդարադատության նախարարը շեշտեց՝ նա ամբողջությամբ արդարացվել է: «Եվրոպական դատարանի վճիռ կա, որտեղ հաստատված է նրա անմեղությունը»,- պնդեց նա:

Հարցին՝ անցումային արդարադատության կիրառումը դատական իշխանափոխության արտահայտություն չէ՞, նախարարը պատասխանեց խոստմամբ` այս մասին ավելի ուշ հրավիրվելիք ասուլիսում խոսել, այդ թվում՝ վեթինգի:

Իսկ թե ԲԴԽ-ն ինչ-որ կերպ լուծարելու իրավական հիմքեր կա՞ն, օրենքը նման հնարավորություն տալի՞ս է, Արտակ Զեյնալյանն ասաց, որ օրենսդրական հիմք չկա: