Այս քրեական գործում 10 սպանության փաստ ընդհանրապես չկա. Քոչարյան

Այս քրեական գործում 10 սպանության փաստ ընդհանրապես չկա. Երևանի ընդհանուր իրավասության դատարանում հայտարարեց ՀՀ երկրորդ նախագահ Ռոբերտ Քոչարյանը: Նա այս մասին խոսեց այն բանից հետո, երբ պաշտպան Հայկ Ալումյանը մեջբերեց մեղադրանքից մի դրվագ, թե «իշխանությունը պահելու և ընթացող քաղաքական իրադարձությունները ճնշելու գործում ներգրավվել են Ռոբերտ Քոչարյանին  մերձավոր որոշ անձինք»՝ նշելով, որ ոչ մի անուն «որոշ անձանցից» չի նշվում, ինչպես նաև, թե Քոչարյանը նրանց հետ ի՞նչ կապ է ունեցել,  ի՞նքն է հրահանգել, թե՞ ոչ: 

«Կա՞ն ձերբակալվածներ, կա՞ն քննչական գործողություններ այդ «որոշ մարդկանց» գտնելու ուղղությամբ: Ես կարող եմ ենթադրություն անել, թե ինչի համար է սա: Այս քրեական գործում 10 սպանության փաստ ընդհանրապես չկա: Այս դրվագը ներառել են, որ մարդկանց ուղեղը մտցնեն, թե կարո՞ղ է այդ սպանությունները կատարվել են «մերձավոր անձանց» կողմից»,- ասաց Ռոբերտ Քոչարյանը՝ նշելով, որ սա մարդկանց գիտակցության մեջ թույն մտցնելու համար է։