Փաշինյանը կա՛մ թյուրըմբռնել է ինֆորմացիան, կա՛մ ամբողջապես չի տիրապետում դրան. Իվետա Տոնոյան

«Բարգավաճ Հայաստան» խմբակցության պատգամավոր Իվետա Տոնոյանը վստահ է` ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Նաիրա Զոհրաբյանն ունի մանսագիտական  բոլոր անհրաժեշտ որակները, որ իրականացնի կանոնակարգով իրեն վերապահված գործառույթները: Խորհրդարանում լրագրողների հետ ճեպազրույցում նա նշեց, որ ծանոթ են վարչապետի հայտարարությանը, բայց կարծում են, որ Փաշինյանը կա՛մ թյուրըմբռնել է ինֆորմացիան, կա՛մ ամբողջապես չի տիրապետում դրան:

«Այդ անձնավորությանը Զոհրաբյանը հրավեր չի ուղարկել ու Հայաստան վերադառնալուն պես ավելի առարկայական կներկայացնի բոլոր ապացույցները: Իսկ այն փաստաթուղթը, որ մատնացույց արեց նաև վարչապետը, ընդամենը անվտանգության աշխատակիցների համար իջեցված փաստաթուղթն է»,- կրկնեց պատգամավորը:

Դառնալով տրանսգենդեր կնոջ ելույթին` Տոնոյանն ասաց` հարցի վերաբերյալ  իրենց տեսակետը հետևյալն է. «ԲՀԿ-ն ազգային արժեհամակարգը պահպանող կառույց է»:

Հիշեցնենք, որ այսօր Նորագավիթի մաքսատուն այցելած վարչապետ Նիկոլ Փաշինյանը լրագրողների հետ զրույցում ասել էր, թե ԲՀԿ-ն քաղաքական պրովոկացիա է անում, ու պետք է մտածի` մարդու իրավունքների հանձնաժողովի նրանց ներկայացրած թեկնածուն արդյո՞ք համապատասխանում է անհրաժեշտ նվազագույն պայմաններին: