ԲՀԿ-ն առաջիկայում կհրապարակի խորհրդարանի ընդդիմադիր փոխխոսնակի` իր թեկնածուի անունը. Իվետա Տոնոյան

ԲՀԿ-ն ԱԺ նախագահի տեղակալի թեկնածություն առաջադրելու է: Այս մասին լրագրողների հետ զրույցում ասաց ԲՀԿ խմբակցության պատգամավոր, ԲՀԿ նախագահի մամուլի քարտուղար Իվետա Տոնոյանը:

«Որպես խորհրդարանում մեծությամբ երկրորդ ուժ և ամենամեծ ընդդիմադիր խմբակցություն` ԲՀԿ-ն ԱԺ նախագահի տեղակալի թեկնածություն առաջադրելու է: Առաջիկա օրերին արդեն մեր թեկնածուի անունը կհրապարակենք: Մեր բազմաթիվ գործընկերների անուններ են շրջանառվում այս օրերին՝ Վահե Էնֆիաջյան, Նաիրա Զոհրաբյան, Միքայել Մելքումյան: Պետք է զինվել համբերությամբ և սպասել փոքր-ինչ»,- նշեց նա՝ շարունակելով.  «Թե ով ինչ պաշտոն է զբաղեցնելու՝ և՛ խմբակցության քարտուղար, և՛ հանձնաժողովների նախագահներ, երբ արդեն լինի որոշակիություն, ինչպես նաև փոխնախագահ, ավելի ուշ այդ ամեն ինչի մասին քաղխորհրդի հայտարարությամբ հանդես կգանք»։

Հակադարձմանը՝  փաստորեն, պաշտոններում առաջադրումների հարցով  ԲՀԿ-ն դեռ որոշումներ չունի՞, Տոնոյանը պատասխանեց.  «Որոշումներ կան, սակայն դրանց մասին կհայտարարվի փոքր-ինչ ուշ»։