Հայկ Գևորգյանը փաստերի տրամադրման առումով առնվազն ազնիվ չի եղել. Իվետա Տոնոյան

«Բարգավաճ Հայաստան» խմբակցության պատգամավոր Իվետա Տոնոյանն այսօր խորհրդարանական ճեպազրույցների ժամին, անդրադառնալով «Արարատցեմենտի» շուրջ եղած բանավեճերին, ասաց, որ «Իմ քայլը» խմբակցության պատգամավոր Հայկ Գևորգյանը փաստերի տրամադրման առումով առնվազն ազնիվ չի եղել:

«Խորհրդարանական ամբիոնից նա հայտարարեց, թե մասնավորեցման գործընթացը 200 հազար դոլար է արժեցել: Պայմանագիրը ձեռքիս տակ է, ու կարող եք ինքներդ էլ տեսնել: Նա նշում է միայն երկրորդ կետը, որի համաձայն՝ մասնավորեցման համար 200 հազար դոլար է նախատեսված, սակայն չի նշում հենց դրան հաջորդած 3-րդ կետը, որում մնացած բոլոր ֆինանսական հարցերն են, մասնավորապես՝ 6 մլն 866 հազար դոլար պատքերի մարում և այլն, և այլն: Ընդհանուր առմամբ, 10 մլն դոլարից էլ ավելի գումար է արժեցել մասնավորեցման ամբողջ գործընթացը՝ հաշվի առնելով պարտքերի մարումն ու մնացյալ ծախսերը»,- մանրամասնեց Տոնոյանը:

Հիշեցնենք, որ ԱԺ-ում «Պետական տուրքի մասին» օրենքում փոփոխությունների նախագծի քննարկման ժամանակ «Իմ քայլը» խմբակցության պատգամավոր Հայկ Գևորգյանն իր ելույթում հայտարարել էր, որ «Արարատ ցեմենտ» գործարանը ձեռք է բերվել 200 հազար դոլարով: Արձագանքելով պատգամավորին՝ Գագիկ Ծառուկյանը նշել էր, որ եթե դա համապատասխանում է իրականությանը, և պատգամավորը կարող է ապացուցել իր խոսքերի ճշմարտացիությունը, ապա ինքը պատրաստ է նվիրել ցեմենտի գործարանը Գևորգյանին: