Ճապոնիայում հայտարարվել է նոր կայսերական դարաշրջանի անունն ու պաշտոնական մեկնարկի օրը

Ճապոնիան ապրիլի 1-ին հայտարարել է երկրում կայսերական նոր դարաշրջանի անունն ու դրա պաշտոնական մեկնարկի օրը: Այս մասին տեղեկացնում է Reuters-ը:

Ռեյվա դարաշրջանը կսկսվի մայիսի 1-ից, երբ թագաժառանգ Նարուհիտոն ստանձնի կայսեր պաշտոնը: Նա գահը ժառանգելու է հորից՝ կայսր Ակիհիտոյից, որն ապրիլի 30-ին կհայտարարի գահից հրաժարվելու մասին: Այսպիսով` վերջ կդրվի 31 տարի տևած Հեյսեյ կայսերական դարաշրջանին:

Նշվում է, որ կայսերական դարաշրջանի անվանումն օգտագործվում է փաստաթղթերում, թերթերում, օրացույցերում, ինչպես նաև մետաղադրամների վրա: Թեև Ճապոնիան օգտագործում է նաև արևմտյան օրացույցը, սակայն շատերը տարիները հաշվելու համար նախընտրում են օգտագործել կայսերական դարաշրջանն ու երբեմն փորձում են արևմտյանը համադրել ավանդականի հետ:

Հավելենք, որ Ճապոնիան կայսերական դարաշրջանի օրացուցային համակարգը փոխառել է Չինաստանից դեռևս 1300 տարի առաջ: