Պակիստանի վարչապետը խորհրդակցություն է հրավիրել` Հնդկաստանի հետ հարաբերությունների սրման հետ կապված

Պակիստանի վարչապետ Իմրան Խանն այսօր խորհրդակցություն կունենա նախարարների կաբինետի հետ, որի ժամանակ կքննարկվի  Հնդկաստանի հետ հարաբերություններում ստեղծված իրավիճակը. հայտնում է РИА Новости-ն:

Հիշեցնենք, որ երեկ Պակիստանի բանակը խոցել է հնդկական երկու ռազմական օդանավ և ձերբակալել երկու օդաչուի` երկրի օդային տարածքը խախտելու համար: Հնդկաստանը ավելի ուշ խոցել է պակիստանյան կործանիչ` օդային տարածքը խախտելու համար:

Քիչ առաջ տեղեկացրեցինք, որ Պակիստանի զինվորականները խախտել են հրադադարի ռեժիմը ու Հնդկաստանի հյուսիսային Ջամու և Քաշմիր նահանգի մի քանի բնակավայրեր են գնդակոծել: Միջադեպը տեղի է ունեցել Պունչ շրջանում: Նշվում է, որ հնդկական բանակը պատասխանել գնդակոծությանը:

Փետրվարի 14-ին Քաշմիրի՝ Հնդկաստանի հսկողության տակ գտնվող հատված Պակիստանի կողմից ներխուժած մահապարտը ռումբ է պայթեցրել, ինչի հետևանքով զոհվել է հնդկական ռազմական միավորման առնվազն 40 ծառայող: Ահաբեկչական գործողության պատասխանատվությունը ստանձնել է Jaish-e-Mohammed խմբավորումը:Հնդկաստանը Պակիստանին մեղադրել է ահաբեկիչներին աջակցելու մեջ, Պակիստանն անմիջապես հերքել է մեղադրանքը: