Ուզեցել եմ մյուս թեկնածուին ցույց տալ, որ որևէ անձնական խնդիր չկա. Էնֆիաջյանը` Թանդիլյանին ծաղիկ նվիրելու մասին

Անձական խնդիր չկա ու չի կարող լինել. խորհրդարանում լրագրողներին ասաց ԲՀԿ խմբակցությունից ԱԺ փոխնախագահ Վահե Էնֆիաջյանը՝ անդրադառնալով հարցին, թե ինչու ԱԺ փոխնախագահ ընտրվելուց հետո մյուս թեկնածուին` Մանե Թանդլյանին, ծաղիկներ նվիրեց։

«Մանե Թանդիլյանը մեր գործընկերն է։ Ես պարզապես ուզեցել եմ մյուս թեկնածուին ցույց տալ, որ որևէ անձնական խնդիր չկա ու չի կարող լինել: Քաղաքական ուժերն են ներկայացրել թեկնածուներին, և նրանց քվեարկության արդյունքում է ամեն ինչ որոշվել»,- ասաց նա։

Էնֆիաջյանի համար քվեարկության արդյունքները սպասելի էին, քանի որ ԱԺ ուժերի ներկայացուցիչներն իրենց պաշտոնական դիրքորոշումները ներկայացրել էին, անհատները ևս ելույթ էին ունեցել և հայտարարել` ով ինչպես է քվեարկելու: «Բոլորը քվեարկել են իրենց խղճի մտոք»,- ասաց նա։

Անդրադառնալով նորընտիր խորհրդարանի հանձնաժողովներին, որոնք 11-ը պետք է լինեն՝ 2-ով ավելի, քան նախորդ գումարման ԱԺ հանձնաժողովները՝ Էնֆիաջյանը նշեց, որ հանձնաժողովների ավելացումն ինքնանպատակ պիտի չլինի։ Նա նաև չհերքեց, որ, ամենայն հավանականությամբ, ԲՀԿ-ին բաժին կհասնեն 2-ը՝ Մարդու իրավունքների ու Տարածաշրջանային և ԵՏՄ ինտեգրման ստեղծվելիք հանձնաժողովները։