Թուրքիայում հայ պատգամավորի ամուսինը մահվան սպառնալիքներ է ստանում հայերի իրավունքները պաշտպանելու համար

Թուրքիայում ընդդիմադիր Ժողովրդահանրապետական կուսակցության հայ պատգամավոր Սելինա Դողանի ամուսինը՝ փաստաբան Էրդալ Դողանը, հայերի իրավունքները պաշտպանելու համար մահվան սպառնալիքներ է ստանում: Ըստ Artigercek-ի` նա ենթարկվում է նաև հետապնդումների:

Օրեր առաջ Դողանի գրասենյակի մոտ անհայտ երիտասարդների խումբ է երևացել, որոնք հարցեր են տվել փաստաբանի աշխատանքի գալու եւ աշխատանքից դուրս գալու ժամերի վերաբերյալ: Գրասենյակի անվտանգության տեսախցիկները ֆիքսել են այդ երիտասարդների դեմքերը, եւ տեսագրությունը փաստաբանը հանձնել է ոստիկանությանը: 

Էրդալ Դողանը հայտնի է Թուրքիայի հայ համայնքի ներկայացուցիչների իրավունքների ակտիվ պաշտպանությամբ: Նա Հրանտ Դինքի սպանությունից հետո եղել է նրա ընտանիքի փաստաբանը: