«Ղուրանը ավելի վտանգավոր է, քան կորոնավիրուսը». Ավստրիայի խորհրդարանի փոխխոսնակը սպառնալիքներ է ստանում հայտարարության համար

Ավստրիայի տրանսպորտի նախկին նախարար և Ավստրիայի Ազատության կուսակցության  նախագահ Նորբերտ Հոֆերը սկսել է կյանքին ուղղված սպառնալիքներ ստանալ, այն հայտարարությունից հետո, թե «Ղուրանը ավելի վտանգավոր է, քան կորոնավիրուսը». Այս մասին հաղորդում է ՏԱՍՍ-ը:

Հունիսի 16-ին, Հոֆերը, Վիեննայում իր կուսակցության միտինգի ժամանակ ելույթ ունենալիս, հայտարարել էր, որ ինքը չի վախենում կորոնավիրուսից, բայց «Ղուրանը ավելի վտանգավոր է»: Ավստրիայի մայրաքաղաքում հավաքված բնակիչները նրան ողջունել են ծափահարություններով:

Հոֆերի խոսքով, այս հայտարարությունից հետո նա սկսել է կյանքին ուղղված սպառնալիքներ ստանալ: «Ես մտադիր չեմ համակերպվել այն փաստի հետ, որ ինչ-որ մեկը սպառնում է ինձ սպանել», - ասել է Հոֆերը՝ նշելով, որ ինքը մտադիր է սպառնալիքները փոխանցել ավստրիական անվտանգության ուժերին:

Հինգշաբթի կուսակցության գլխավոր քարտուղար Մայքլ Շնեդլիցը տեղեկացրել էր, որ «սոցիալական ցանցերում արմատական իսլամիստները սահմաններ չգիտեն և մահմեդականներին կոչ են անում սպանել Հոֆերին»: