Իր կուսակցությանը շատ ձայներ բերելու համար Թորոսյանը կառաջադրվի ՔՊ ռեյտինգային ցուցակով

Առողջապահության նախարարի պաշտոնակատար Արսեն Թորոսյանը «Իմ քայլը» դաշինքի ցուցակով` ռեյտինգային ընտրակարգով, առաջադրվելու է Երևանի Կենտրոն, Նորք-Մարաշ, Էրեբունի, Նուբարաշեն վարչական շրջաններն ընդգրկող թիվ 4 ընտրատարածքում: Խորհրդարանում լրագրողների հետ զրույցում նա ասաց. «Որպես ռեյտինգային թեկնածու` առաջադրվելու եմ թիվ 4 ընտրատարածքում։ Ներկայացնելու ենք մեր մոտեցումները, աշխատանքը, պլանները»ը: 

Նախարարի պաշտոնակատարի խոսքով՝ առաջադրվելու է «Քաղաքացիական պայմանագիր» կուսակցությանը շատ ձայներ բերելու համար: «Իսկ ընտրություններից հետո արդեն կորոշվի՝ ով է պաշտոնավարում ԱԺ-ում, ով՝ կառավարությունում»,-նշեց նա։

Հարցին՝  իսկ ինքը հակված է աշխատել օրենսդիրո՞ւմ, թե՞ գործադիրում, Թորոսյանը պատասխանեց, որ պատրաստ է շարունակել աշխատել որպես առողջապահության նախարար։

Հարցին՝ բացառվելո՞ւ է հիվանդանոցների անձնակազմերի աջակցությունը ընտրությունների ժամանակ, նա արձագանքեց, որ նոր Հայաստանի տրամաբանության շրջանակներում է, որ վարչական ռեսուրսի չարաշահում տեղ չունենա որևէ ընտրության ժամանակ։

Ինչ վերաբերում է իր պաշտոնանկության մասին տեղեկություններին, Արսեն Թորոսյանը հիշեցրեց, որ շարունակում է պաշտոնավարել: «Նոր կառավարության ձևավորման ժամանակ այդ հարցին պատասխան կտրվի»,- ասաց նա։